Մարդու իրավունքների եվրոպական դատարանի որոշումը Դողու Փերինչեքի գործով կարող է միայն խթանել Հայոց ցեղասպանության ժխտման գործընթացիը: Նման բովանդակությամբ հայտարարություն է տարածել Ֆրանսիայի հայկական կազմակերպությունների համակարգող խորհուրդը՝ մեկնաբանելով Եվրոպական դատարանի որոշումը հայոց ցեղասպանությունը ժխտող թուրք գործիչ Դողու Փերինչեքի օգտին: Այդ մասին գրում է «Nouvelles d`Arménie»-ն:
«Ֆրանսիայի հայկական կազմակերպությունների համակարգող խորհուրդը զարմացած է, որ այս դատավճռում անտեսվում է Դողու Փերինչեքի պատկանելիությունը Թալեաթի կոմիտեին՝ Հայոց ցեղասպանության ժխտման արհեստանոցը, որը ստեղծվել է Անկարայի կողմից Եվրոպա եւ դրա սահմաններից դուրս «պաշտոնական պատմությունն» արտահանելու համար, որը Թուրքիան մեկ դարի ընթացքում պարտադրում է իր ժողովրդին: Խորհուրդը բարկանում է, որ Մարդու իրավունքների եվրոպական դատարանը հենվում է թուրքական պետության ռեվիզիոնիստական քարոզչության վրա եւ դրա հիման վրա եզրակացություն է անում, որ ցեղասպանության որակավորման հարցում չի կարող կոնսենսուս լինել: Խորհուրդը նաեւ չի կարող ընդունել անհավասար վերաբերմունքը ժխտման նկատմամբ անկախ նրանից, թե 20-րդ դարի երկու կարեւոր ցեղասպանություններից որի մասին է խոսքը, այն ժամանակ, երբ Եվրամիության շրջանակային որոշումը հրավիրում է բոլոր եվրոպական պետություններին օրենքներ ընդունել ցեղասպանությունների ժխտման քրեականացման վերաբերյալ:
Ֆրանսիայի հայկական կազմակերպությունների համակարգող խորհուրդը առաջիկա օրերին հանդես կգա մի շարք նախաձեռնություններով ի նշան բողոքի այս անարդար որոշման դեմ, որը կայացվել է գաղտնի՝ տոների նախաշեմին: Խորհուրդը հուսով է, որ Շվեյցարիան, չնայած վերջերս Թուրքիայի հետ ռազմավարական համագործակցության պայմանագրի ստորագրմանը, բողոքարկելու է որոշումը, եւ այդ գործը կհանձնեն Դատարանի մեծ պալատին: Այդ դեպքում հայկական կողմը, որը բացակայել է առաջին ատյանում, կարող է արտահայտել իր տեսակետը թուրքական կողմի հետ հավասար պայմաններում եւ արդարության համարժեքություն կմտցնի, որը կշեռքի միայն մեկ նժարին է», - ասվում է Ֆրանսիայի հայկական կազմակերպությունների համակարգող խորհրդի հայտարարության մեջ:
Հիշեցնենք, որ ՄԻԵԴ-ը բավարարել է հակահայ թուրք գործիչ Դողու Փերինչեքի հայցն ընդդեմ Շվեյցարիայի՝ իր որոշումը հիմնավորելով խոսքի ազատության սկզբունքով: Թուրքիայի Աշխատավորական կուսակցության նախագահ Դողու Փերինչեքը 2008թ.-ին Շվեյցարիայում դատապարտվել էր Հայոց ցեղասպանության փաստը հրապարակայնորեն ժխտելու համար: