Թուրք հայտնի գրող Այշե Քուլին հայկական «Ակոս»-ին ուղարկած նամակում մասնակի ներողություն է հայցել իր մտքերը հեռուստաեթերով սխալ շարադրելու համար։
Այշե Քուլին, ով օրեր առաջ CNNturk-ի մի հաղորդման ժամանակ ժխտել էր Հայոց ցեղասպանության փաստը՝ ասելով. «Այնպես չէ, որ հայերը իրենց համար կանգնած էին, մենք էլ կոտորեցինք», իր խոսքերը պարզաբանող նամակ է ուղարկել Ստամբուլի հայկական «Ակոս» շաբաթաթերթի խմբագրություն։
Նամակում Այշե Քուլինը պնդել է, թե ինքը սխալ է արտահայտվել, որն էլ թույլ է տվել ենթադրությունների, թե ինքը նշել է, թե հայերին տեղին են կոտորել։ «Ես ուղղակի ուզել եմ ասել, որ Գերմանիայում Հիտլերի արածներն այլ էին, Թուրքիայում հայերի դեմ արածները՝ այլ։ Այսինքն, հայերը եւ թուրքերը սարսափելի պատերազմի մեջ էին, միմյանց դեմ կռվում էին ու սպանում։ Դե ամեն պատերզամ էլ կոտորած է։ Ես ամաչում եմ, որ այդտեղ նաեւ թուրքերի բաժին մեղավորությունը կա»,-գրել է Այշե Քուլին՝ շեշտելով, որ իր սխալ հասկացված արտահայտության համար բոլորից, Թուրքիայի բոլոր հայերից ներողություն է խնդրում։
Թուրք գրողը սակայն կրկին նշել է, թե չի համարում, որ Թուրքիայում Հայերի դեմ ցեղասպանություն է տեղի ունեցել՝ համարելով այն ընդամենը կոտորած։
Նշենք, որ Այշե Քուլինի դեմ change.org կայքով Ուղուր Դերինի կողմից բողոք-ստորագրահավաք է կազմակերպվել։ Ստորագրահավաքի տեքստում նշվել է «Նրանից ներողություն չենք սպասում, մենք խստորեն դատապարտում ենք նրան, բոյկոտում նրա գրքերը եւ ողջամիտ մարդկանց կոչ անում չկարդալ դրանք»։