Մարդկության պատմության ամենամեծ ոճրագործներից մեկը՝ Թուրքիան, անկախ իր քաղաքական ղեկավարության փոփոխությունից, շարունակում է ժխտել, ուրանալ 20-րդ դարասկզբի ամենամեծ ոճիրը: Այդ մասին ասվում է Սոցիալ դեմոկրատ Հնչակյան կուսակցության «Սարգիս Տխրունի»ուսանողական-երիտասարդական միության հայտարարության մեջ:
«Մոտենում է 2015 թ-ը, այսինքն լրանում է Թուրքիայի կողմից ծրագրված եւ իրականացված Հայոց ցեղասպանության 100-րդ տարելիցը: Մեկ եւ կես միլիոն մեր հայրենակիցները իրենց բնօրրանում բնաջնջվեցին միայն նրա համար, որ հայ էին: Մարդկության պատմության ամենամեծ ոճրագործներից մեկը՝ Թուրքիան, անկախ իր քաղաքական ղեկավարության փոփոխությունից, շարունակում է ժխտել, ուրանալ 20-րդ դարասկզբի ամենամեծ ոճիրը, ավելին, ուրացման այդ քաղաքականությունը վերաճել է հայաֆոբիայի՝ բոլոր հնարավոր դրսեւորումներով:
Ցանկանալով մոռացության տալ Ցեղասպանության, մեր միլիոնավոր նահատակների, ունեզուրկ եւ հայրենազույկ հայրենակիցների հարցը, պաշտոնական Անկարան իր քիթն է խոթում անգամ արցախյան հակամարտության մեջ՝ դրա ադրբեջանամետ լուծումն իբրեւ նախապայման առաջարկելով հայ-թուրքական սահմանի բացման համար:
Այսօր, այս պահին մեր երկրում է գտնվում ցեղասպան երկրի արտաքին գործերի նախարարը, մի անձ, ով դարձել է ողջ աշխարհով մեկ հակահայկականության յուրահատուկ խորհրդանիշ: Մենք՝ հայ երիտասարդներս, մեր վճռական ոչն ենք ասում Հայաստանում սույն անձի ներկայությանը, պահանջում նրան ժամ առաջ վերադառնալ Անկարա ու չպղծել մեր օդն ու միլիոնավոր նահատակների հիշատակն իր ներկայությամբ: Ցեղասպանության ճանաչումն անկասելի է, Անկախ եւ Միացյալ Հայաստանի կերտումը՝ անխուսափելի»,- ասվում է հայտարարության մեջ:
Լուրեր Հայաստանից — NEWS.am
