Ապրիլի 24-ին Հռոմի Սուրբ Նիկողայոս հայկական կաթողիկե եկեղեցում Հռոմի Հայ Կաթողիկե Լեւոնյանվարժարանի Մեծավոր հայր ԳեւորգՆորատունկյանի կողմից մատուցվեց Հայոց ցեղասպանության զոհերի հիշատակին նվիրված պատարագ, որին մասնակցեցին նաեւ Սուրբ Աթոռում ՀՀ դեսպան Միքայել Մինասյանը եւ Իտալիայում ՀՀ դեսպան Սարգիս Ղազարյանը:
Պատարագի շուրջ 100 ներկաների թվում էին Սուրբ Աթոռում եւ Իտալիայում հավատարմագրված դեսպաններ, Հռոմի Հայ Առաքելական Համայնքի հոգեւոր հովիվը, հայ համայնքի ներկայացուցիչներ, կաթողիկե բարձրաստիճան եկեղեցականներ, Սուրբ Աթոռում հավատարմագրված լրագրողներ:
Պատարագից հետո խոսք տրվեց դեսպան Մինասյանին, որն իր ուղերձում, ողջունելով ներկաներին, մասնավորապես նշեց, որ հայ ժողովուրդը, չնայած 98 տարիների ընթացքում կրած դժվարություններին, նահատակների հիշատակը վառ պահելով, տոկունությամբ եւ պայքարի միջոցով, այնուամենայնիվ, կարողացավ ստեղծել ինքնուրույն պետություն եւ պահպանել այն: Միջոցառմանը ելույթ ունեցավ նաեւ Իտալիայում ՀՀ դեսպանը:
Պատարագից հետո, ի հիշատակ Եղեռնի անմեղ զոհերի, խաչքարի մոտ զետեղվեց ծաղկեպսակ:
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏԱՔԻՆ ԳՈՐԾԵՐԻ ՆԱԽԱՐԱՐՈՒԹՅՈՒՆ