52-ամյա Սվետլանա Մարգարյանը, որն արդեն 21 տարի բնակվում է Հայաստանից դուրս, Հարավային Հնդկաստանի Պոնդիչերի քաղաքում հետաքրքիր դեպքի է ականատես եղել։ «Ակոս» շաբաթաթերթի նախկին խմբագրապետ Հրանտ Դինքի սպանության օրը նա իրենց ընտանիքին պատկանող ռեստորանի ճաշարանից հայկական երգի հնչյուններ է լսել։ Խոհանոցից դուրս է վազել ու նկատել, որ երաժշտության ձայնը գալիս է սեղաններից մեկը մոտ նստած կնոջ համակարգչից։
«Խոհանոցում օգնում էի աշխատողներին ու հանկարծ ականջիս հասան հայկական երգի՝ «սարի աղջիկ, աման, սիրուն աղջիկ,աման...» բառերը: Զարմանքով դուրս եկա խոհանոցից: Անկյունի սեղանի առաջ միայն այդ կինն էր, դիմացը՝ իր համակարգիչը, որտեղից էլ լսվում էր երգը։ 50-55 տարեկան ցորենամորթ ու գեղեցիկ մի կին էր, որի ազգությունը չգիտեի: Մոտեցա և ուրախ, կարծելով որ հայրենակցի եմ հանդիպել աշխարհի հեռավոր այս ծայրում, տեսա կնոջ դեմքն ամբողջովին կաս-կարմիր կտրած։ Նա լուռ ու անչափ հուզված լալիս էր։ Ժպիտս կորավ մի պահ, և ես զարմանքով հարցրեցի հայերեն, թե նա հա՞յ է։ Նա չհասկացավ: Հարցս կրկնեցի իմ ոչ այնքան վարժ անգլերենով: Կինը պատասխանեց անգլերեն՝ ոչ, թուրք եմ, իսկ դու՞ք: Ասացի որ հայ եմ: Նա միանգամից պայծառացավ, հետո հարցրեց, թե գիտե՞մ Հրանտ Դինքի մասին, գիտե՞մ, որ նա «Ակօս» թերթի խմբագիրն էր, որը սպանվեց հունվարի 19-ին»,- NEWS.am-ին պատմեց Սվետլանա Մարգարյանը։
Տիկին Սվետլանան երկար զրուցել է կնոջ հետ, պատմել, որ իր ընտանիքից 12 մարդ է սպանվել 1915թ. Օսմանյան Թուրքիայում իրականացված Ցեղասպանության ժամանակ: Թուրք կինն արտասվել է, ասել, որ ափսոսում է կատարվածի համար, Հրանտ Դինքի համար։ Ընկերացել են, միասին արտասվել ու լուսանկարվել։
Հիշեցնենք, որ 2007թ. հունվարի 19-ին Հրանտ Դինքը սպանվեց Ստամբուլում, իր ղեկավարած «Ակոս» թերթի խմբագրատան շենքի դիմաց: Մինչեւ սպանությունը նա իր բազմիցս ահազանգել էր, որ իր հասցեին սպառնալիքները հաճախակի են դարձել։ Բացի այդ, նա բողոքում էր, որ ոստիկանությունը հրաժարվել է պաշտպանել իրեն հնարավոր մահափորձից: Հունվարի 19-ին Ստամբուլում, Հրանտ Դինքի մահվան 7-րդ տարելիցի կապակցությամբ, Թուրքիայում եւ աշխարհի այլ երկրներում մի շարք կազմակերպություններ իրականացրել են սգո եւ բողոքի միջոցառումներ։