Իտալացի հայտնի գրող Ումբերտո Էկոյի «Վարդի անունը» (Il nome della Rosa, 1980) լեգենդար վեպը, ինչպես նաև Նոբելյան մրցանակի դափնեկիր, թուրք գրող Օրհան Փամուկի «Իմ անունն է Կարմիր» (Benim adım Kırmızı, 1998) վեպն առաջին անգամ հայերեն կհրատարակվեն 2014 թվականին, հայտնեց գրականագետ, «Անտարես» հրատարակչության գլխավոր խմբագիր Արքմենիկ Նիկողոսյանը։
Ըստ նրա, թարգմանություններն իրականացվել են բնագրերից, և, ի տարբերություն ռուսերեն թարգմանությունների, կլինեն լիարժեք, առանց կրճատումների։
«Վերջին երկու տարիների ընթացքում Հայաստանում էապես աճել է հետաքրքրությունն արտասահմանյան գրականության նկատմամբ, այդ պատճառով մենք նախաձեռնել ենք բազմաթիվ ստեղծագործությունների հրատարակություն, որոնք մինչ այդ անհասանելի են եղել հայերենով»,- երեքշաբթի Նիկողոսյանն ասաց լրագրողներին։
Ումբերտո Էկոն ժամանակակից խոշորագույն գրողներից է։ «Վարդի անունը» Էկոյի առաջին վեպն է, որը հրապարակվել է 1980 թվականին, հեղինակին համաշխարհային ճանաչում բերած առաջին ինտելեկտուալ վեպն է, որը գլխավորել է ամենաշատ վաճառվող գրքերի ցուցակը։
Օրհան Փամուկը թուրք ժամանակակից գրող է, մի քանի ազգային և միջազգային գրական մրցանակների, այդ թվում` գրականության Նոբելյան մրցանակի դափնեկիր է (2006)։Ճանաչված է ինչպես Թուրքիայում, այնպես էլ նրա սահմաններից դուրս, գրողի ստեղծագործությունները թարգմանվել են ավելի քան հիսուն լեզուներով։ Հայտնի է Հայոց ցեղասպանության և Թուրքիայում քրդերի նկատմամբ խտրականության մասին իր քաղաքացիական դիրքորոշմամբ, որը չի համընկնում թուրքական իշխանությունների կարծիքի հետ։
ar.newsarmenia.ru