Ներառական ժամանակակից պարային խումբ է ստեղծվում Հայաստանում` Գեղագիտության ազգային կենտրոնի Փոքր թատրոնին առընթեր` Candoco ժամանակակից պարերի բրիտանական թատրոնի նմանությամբ, «Նովոստի–Արմենիա» գործակալությանը հայտնեց Բրիտանական խորհրդի հայկական գրասենյակի տնօրեն Արևիկ Սարիբեկյանը։
Candoco պարի բրիտանական թատրոնը միավորում է ինչպես սովորական պարողների, այնպես էլ սահմանափակ ֆիզիկական կարողություններով պարողների։ Թատրոնը հայտնի է նրանով, որ սեփական ելույթի ուժով կոտրում է մարդկային հնարավորությունների և արվեստի մասին կարծրատիպերը` շեշտադրելով մարդկանց շփումը։
Candoco–ն, որը մասնակցել է Լոնդոնի Պարալիմպիադա–2012–ի փակմանը, առաջին անգամ ելույթ է ունեցել Երևանի Ստանիսլավսկու անվան պետական ռուսական դրամատիկական թատրոնի շենքում նախորդ տարվա մարտին։ Հայ հանդիսատեսին ներկայացրել է «Բեմադրությամբ երեք գործողությամբ»։
«Candoco–ի ելույթից հետո մեզ մոտ համագործակցության գաղափար առաջացավ Հայաստանում նմանատիպ պարային խումբ ստեղծելու նպատակով։ Ներկայում մենք աշխատում ենք այդ ուղղությամբ, պարողների ընտրություն է ընթանում»,– ասաց Սարիբեկյանը։ Նա հայտնեց, որ այս տարվա մայիսին Հայաստան կժամանեն Candoco–ի պրոֆեսիոնալ պարողներ թրեյնինգ անցկացնելու և պարողների ընտրությանն աջակցելու համար։
Նախորդ տարի Մեծ Բրիտանիա են մեկնել ժամանակակից և դասական պարի մի քանի մանկավարժներ Հայաստանից Candoco–ի վերապատրաստման հատուկ դասընթացներին մասնակցելու համար։ Հայաստան վերադառնալով` նրանք պրոֆեսիոնալ պարողների և սիրողների ընտրություն են սկսել, որի արդյունքներով էլ կստեղծվի ներառական պարային խումբ։
Հատուկ դասընթացներին մասնակցելու և հետագայում հայկական ներառական պարային խմբի կազմում հայտնվելու համար կարելի է դիմել Gohar.Harutyunyan@britishcouncil.org.am էլեկտրոնային հասցեով մասնակցության ձևը ստանալու համար։ Ընտրությունը կանցկացվի մրցութային կարգով։ Մարզերից ժամանած մասնակիցներին Բրիտանական խորհուրդը կօժանդակի տրանսպորտի և բնակարանի ծախսերը հոգալու հարցում։
Հայտերի ընդունման վերջին ժամկետը փետրվարի 25–ն է։
Բրիտանական խորհրդի կողմից ներառական պարային խումբը ստեղծվում է «Պար առանց սահմանների» ծրագրի շրջանակներում` ՀՀ մշակույթի նախարարության և Մեծ Բրիտանիայում հայկական համայնքի աջակցությամբ։
ar.newsarmenia.ru