Կրասնոդարի երկրամասի Անապայի շրջանում գործող Ն.Ա. Իսպիրյանի անվան Հայկական ազգային մշակույթի կենտրոնը (ՀԱՄԿ) դարձել է 20 տարեկան: Ինչպես տեղեկացնում է Ռուսաստանի հայերի «Երկրամաս» թերթի Լրատվական Կենտրոնը, հոբելյանին նվիրված հանդիսավոր ժողովը անցկացվել է «Արին-Բերդ» մշակութային կենտրոնում, որը գտնվում է Անապայի մոտերքի հայկական գյուղերից մեկում՝ Հայկաձորում (Ռուսաստանում ընդունված պաշտոնական գրաձեւը Հայ-Կոձոր է):
Հայ Առաքելական Եկեղեցու քահանայի աղոթքից սկսված ժողովին ամփոփվել են ՀԱՄԿ-ի աշխատանքի արդյունքները: Բացի Կենտրոնի նախագահ Լեւոն Ադամյանից ելույթ են ունեցել նաեւ Հայկաձորի գյուղական շրջանի նախագահ Ա.Մարգարյանը, Անապայի վարչության պետի պարտականությունները կատարող Ա. Կոֆտունը, Պատգամավորների քաղաքային խորհրդի նախագահ Լ.Կոչետովը, շրջանային կազակական ընկերության ատաման Վ.Պլոտնիկովը եւ այլոք:
Լեւոն Ադամյանի ելույթից հայտնի է դարձել, որ ՀԱՄԿ-ը Կրասնոդարի երկրամասի լավագույն հայկական կազմակերպություններից մեկն է: Կենտրոնը մշտապես տրամադրում է նյութական օժանդակություն՝ հայ մշակույթի պահպանման, ստեղծագործական կոլեկտիվների համար ազգային տարազների կարման համար, լուծում է սոցիալ-կենցաղային հարցեր, որոնցով կազմակերպությանը դիմում են ոչ միայն հայերը, այլեւ աջակցության կարիք ունեցող շրջանի այլ բնակիչները: Կենտրոնի բազայի վրա աշխատում են հայոց լեզու դասավանդող մանկավարժներ: Շուտով Անապայում կավարտվի Սուրբ Գեւորգ եկեղեցու կառուցումը:
Ժողովի ժամանակ ՀԱՄԿ-ի պատվոգրերով պարգեւատրվել են Անապայի ականավոր մարզիկներն ու մարզիչները, մանկավարժները, մշակույթի աշխատողները եւ վետերանները, ում աշխատանքը դարձել է համայնքի գործունեության մեջ զգալի ներդրում: Քաղաքային վարչության պետի պատվոգրերով ակտիվ հասարակական-քաղաքական դիրքի եւ բուժավայրի սոցիալ-տնտեսական զարգացման մեջ մեծ անձնական նեդրման համար պարգեւատրվել է համայնքի 10 ներկայացուցիչ: Կրասնոդարի երկրամասի Օրենսդիր Ժողովի պատգամավոր Անդրեյ Զիրինովը պարգեւներ է հանձնել տասը անապացիների՝ ակտիվ կենսական դիրքի, ինտերնացիոնալիզմի եւ Ն.Ա. Իսպիրյանի անվան Հայկական ազգային մշակույթի կենտրոնի ստեղծման եւ զարգացման գործում մեծ անձնական ներդրման համար:
