Մարտի 5-ին, Սամցխե-Ջավախքի հայկական հասարակական կազմակերպությունների խորհրդի համակարգող, Ա-Ինֆո լրատվական գործակալության տնօրեն Արտակ Գաբրիելյանը ժամանել է Եվրոպա, քաղաքական եւ համայնքային մի շարք հանդիպումների համար։
Մարտի 6-ից, Արտակ Գաբրիելյանը Բրյուսելում է, որտեղ հանդիպումներ է ունենում Եվրոխորհրդարանի անդամների եւ Եվրոմիության այլ կառույցների ներկայացուցիչների հետ։ Սամցխե-Ջավախքի հայկական հասարակական կազմակերպությունների խորհրդի համակարգողի Բրյուսել այցելությանը աջակցում է Հայ Դատի Եվրոպայի հանձնախմբի Բրյուսելի գրասենյակը։ Արտակ Գաբրիելյանը Բրյուսելում հանդիպումներ կունենա մինչեւ Մարտի 9-ը։
Մարտի 6-ին, Եվրոխորհրդարանում, ՍՋՀՀԿ Խորհրդի համակարգողը առանձին հանդիպումներ է ունեցել Եվրոխորհրդարանի փոխ նախագահ Եորղոս Փափասթամքոս (Եվրոխորհրդարանի Հարավային Կովկասի պատվիրակության անդամ), Թրայան Ունկուրեանուի (Եվրոխորհրդարանի արտաքին հարաբերությունների հանձնախմբի անդամ եւ Սեւ ծովյան հարցերի զեկուցաբեր, Եվրոնեստի փոխ նախագահ) եւ Անդրեյ Քովաչեւի հետ (Եվրոխորհրդարանի արտաքին հարաբերությունների հանձնախմբի փոխ նախագահ)։
Մարտի 7-ի առավոտ, Ա. Գաբրիելյանը առանձին հանդիպումներ է ունեցել Եվրոխորհրդարանի անդամներ Չարլզ Թանոկի (անդամ՝ արտաքին հարաբերությունների եւ մարդու իրավունքների հանձնախմբերի) եւ Յիրի Մաշթալքաի (ԵՎրոխորհրդարանի բյուրոյի անդամ, Եվրոնեստի անդամ) հետ։
Հանդիպումների ժամանակ Արտակ Գաբրիելյանին ընկերակցել են Հայ Դատի Բրյուսելի գրասենյակի պատասխանատու Գասպար Կարապետյանն ու Պետո Դեմիրճյանը՝ գրասենյակի աշխատակազմից։
Իր բոլոր հանդիպումների ժամանակ, Արտակ Գաբրիելյանը իր խոսակիցներին հանձնել է Սամցխե-Ջավախքի հայկական հասարակական կազմակերպությունների խորհրդի կողմից հուշագիրը, որտեղ ներկայացված են երկրամասի հայության դիմագրաված խնդիրներն ու դրանք լուծելու ճանապարհները, ներկայացվում են Ջավախքի հայության պահանջները.
ա) Վերջ տալ երկրամասի ժողովրդագրական պատկերը փոխելու ճիգերին.
բ) Տեղական եւ պետական կառավարման կառույցներում բարելավել հայերի ներկայացվածությունը.
գ) Սոցիալական եւ տնտեսական զարգացման ծրագրեր երկրամասում, նրա մակարդակը այդ բնագավառներում հավասարեցնելու համար երկրի մնացյալ շրջանների վիճակին.
դ) Ազգաբնակչության հայ մեծամասնություն ունեցող վարչական շրջանների կառավարման մարմիններում հայոց լեզվի օգտագործման իրավունք.
ե) Վրաստանի կազմում ինքնավար տարածքային միավորի կարգավիճակ Սամցխե-Ջավախքին եւ հարակից Ծալկա շրջանին։
Սամցխե-Ջավախքի հայկական հասարակական կազմակերպությունների խորհրդի համակարգողն իր խոսակիցների համար մանրամասնեց այս հարցերը եւ շեշտեց, թե ինքը Բրյուսելում է, որովհետեւ Վրաստանի կենտրոնական իշխանությունները չեն պատասխանում իրենց հարցերին, ընթացք չեն տալիս հանդիպումներ ունենալու իրենց դիմումներին, եւ որովհետեւ Խորհուրդը ցանկանում է, որ Եւրոմիությունը, եւ ընդհանրապես Եվրոպան, աջակցեն իրենց բարեկամ Վրաստանին՝ ճիշտ ձեւով լուծելու Ջավախքի խնդիրները։
Ձախից՝ Թրայան Ունկուրեանու, Գասպար Կարապետյան եւ Արտակ Գաբրիելյան
Ձախից՝ Արտակ Գաբրիելյան եւ Անդրեյ Քովաչեւ
Ձախից՝ Չարլզ Թանոկ եւ Արտակ Գաբրիելյան
Ձախից՝ Գասպար Կարապետյան, Արտակ Գաբրիելյան եւ Յիրի Մաշթալքա