ՀՀ սփյուռքի նախարար Հրանուշ Հակոբյանն այցելեց Արարատի մարզի Դարբնիկ համայնք` շնորհավորելու իրաքահայ կանանց մայրության և գեղեցկության տոնի առթիվ:
Դարբնիկ համայնքում ՀՀ սփյուռքի նախարարությունը «Հայաստանում իրաքահայերի ընտանեկան, մշակութային միություն» հասարակական կազմակերպության հետ կազմակերպել էր մայրության և գեղեցկության տոնին նվիրված միջոցառում:
Միջոցառմանը ներկա էին ՀՀ սփյուռքի նախարար Հրանուշ Հակոբյանը, ՀՀ Արարատի մարզպետ Էդիկ Բարսեղյանը, ՀՀ սփյուռքի նախարարի տեղակալ Արմեն Հայրապետյանը, Հայաստանում բնակություն հաստատած իրաքահայեր և այլք:
Ուրախությամբ ողջունելով իրաքահայերին Հայրենի հողի վրա` նախարար Հ.Հակոբյանը սիրով և ջերմությամբ շնորհավորեց իրաքահայ կանանց գարնանային գեղեցիկ տոնի` մայրության և գեղեցկության օրվա առթիվ: Նախարարը կարևորեց հայ կնոջ դերն ընտանիքում` ընդգծելով սերունդների հայեցի դաստիարակության գործում հայ կնոջ և մոր անգնահատելի առաքելությունը:
Ողջունելով միջոցառման մասնակիցներին` «Հայաստանում իրաքահայերի ընտանեկան, մշակութային միություն» հասարակական կազմակերպության նախագահ Վիգեն Կդիկյանը շնորհակալություն հայտնեց ՀՀ սփյուռքի նախարարությանը Հայաստանում հաստատված իրաքահայերին ցուցաբերած աջակցության համար:
Սեդա Մելքոնյանն ընդգծեց կնոջ դերի կարևորությունը Իրաքի հայ համայքում` վստահեցնելով, որ Հայաստանում հաստատված իրաքահայերը ևս իրենց ներդրումը կունենան Հայրենիքի շենացման ու զարգացման գործում:
Միջոցառմանը գեղեցիկ կատարումներով հանդես եկան «Ծաղկազարդ» համույթը և իրաքահայ դպրոցականներ: