Թուրքիայի ԱԳ նախարար Ահմեդ Դավութօղլուի այցը Հայաստան քարոզչական բնույթ ուներ, կարծում է ԵՊՀ Արևելագիտության ֆակուլտետի փոխդեկան Ռուբեն Մելքոնյանը
Դավութօղլուն նախօրեին մասնակցել է Երևանում կայացած Սևծովյան տնտեսական համագործակցության կազմակերպության (ՍԾՏՀ) անդամ–երկրների արտգործնախարարների 29–րդ հանդիպմանը։
«Դավութօղլուի երեկվա այցը, նրա շրջապատն ու քայլերը ցույց են տալիս, որ գերակշռում էին քարոզչական տարրերը, որոնց նպատակն է ցույց տալ, որ Թուրքիան շարունակում է ձգտել Հայաստանի հետ հարաբերությունների կարգավորմանը», – հայտարարեց Մելքոնյանը «2013 թվականի արդյունքները» խորագրով հանրային բանավեճերի ընթացքում։
Փորձագետի խոսքով` ՍԾՏՀ նիստին Թուրքիայի մասնակցությունը քաղաքականացրեց միջոցառումը, և թուրքական ԶԼՄ–ներում նրա այցը ներկայացնում էին որպես Երևան կատարած այց։
Նա ավելացրեց, որ այցի ընթացքում ակնհայտ էր երեք ուղերձ, ինչը հստակ ցույց տվեց Դավութօղլուի մամուլի ասուլիսը` միայն թուրք լրագրողների մասնակցությամբ։ Մասնավորապես, թուրքական կողմը ցանկանում էր ցույց տալ, որ Անկարան պատրաստ է Հայաստանի հետ հարաբերությունների կարգավորմանը, և դրա համար օգտագործում է բոլոր հնարավորությունները, այդ թվում` Երևանում ՍԾՏՀ ԱԳ նախարարների հանդիպումը, նաև ցանկանում էր ցույց տալ, որ հայ–թուրքական հարաբերությունները կարող են կարգավորվել միայն հայ–ադրբեջանական հարաբերությունների կարգավորումից հետո, և Դավութօղլուն պատրաստ է աջակցել դրան։ Մելքոնյանի խոսքով` ևս մեկ ուղերձն այն էր, որ նրանք դատապարտում են 1915 թ.–ի իրադարձությունները, դա համարում են ողբերգություն, այլ ոչ թե ցեղասպանություն և պատասխանատու չեն դրա համար։
«2013 թվականի արդյունքները» խորագրով հանրային բանավեճերը կազմակերպվել է Կովկասի ինստիտուտը` Հենրիխ Բյոլի անվան հիմնադրամի հարավկովկասյան տարածաշրջանային գրասենյակի աջակցությամբ և համագործակցությամբ։
Հայաստանի և Թուրքիայի միջև բացակայում են դիվանագիտական հարաբերությունները, իսկ հայ-թուրքական սահմանը պաշտոնական Անկարայի նախաձեռնությամբ փակ է 1993 թվից: Երկու երկրի միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
Հայաստանի և Թուրքիայի հարաբերությունների կարգավորման գործընթացը 2008 թ.–ի աշնանը նախաձեռնել է ՀՀ նախագահ Սերժ Սարգսյանը։ 2009 թ.–ի հոկտեմբերի 10–ին Հայաստանի և Թուրքիայի արտգործնախարարները Ցյուրիխում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման արձանագրությունը», որոնք պետք է վավերացվեին երկու երկրների խորհրդարանների կողմից։ Սակայն 2010 թ.–ի ապրիլի 22–ին Սարգսյանը հայ–թուրքական արձանագրությունների վավերացման գործընթացը դադարեցնելու մասին հրամանագիր ստորագրեց` հայտարարելով, որ Թուրքիան պատրաստ չէ սկսած գործընթացի շարունակմանը։ Արձանագրությունների վավերացման գործընթացը սառեցված վիճակում է։
Երեքշաբթի «Առավոտ» օրաթերթը, հղում անելով արտգործնախարարության աղբյուրին, գրել էր, որ Հայաստանը մշակել է հայ–թուրքական հարաբերությունների կարգավորման նոր «ճանապարհային քարտեզ», որը մոտ 10 օր առաջ փոխանցվել է անձամբ Թուրքիայի արտգործնախարարին։
Նովոստի–Արմենիա