Մայր Աթոռ Ս. Էջմիածնի Գեւորգյան Հոգեւոր ճեմարանի հանդիսությունների դահլիճում, հունվարի 11-ին, Գարեգին Բ Ամենայն Հայոց Կաթողիկոսն ընդունել է Հայաստանյայց Առաքելական Ս. Եկեղեցու թեմական երիտասարդական միությունների, հասարակական կազմակերպությունների եւ բուհական ուսանողական խորհուրդների անդամներին: Երիտասարդներն այցելել էին Մայր Աթոռ` շնորհավորելու Նորին Սրբությանը Ամանորի եւ Ս. Ծննդյան տոների առիթով եւ ստանալու հայրապետական օրհնությունն ու պատգամը:
Հանդիպման սկզբում բացման խոսքով հանդես եկավ Հայաստանյայց Առաքելական Սուրբ Եկեղեցու երիտասարդաց միավորման կենտրոնական գրասենյակի տնօրեն Գեւորգ Մկրտչյանը, ով ներկա երիտասարդության անունից շնորհավորեց Վեհափառ Հայրապետին Ամանորի եւ Ս. Ծննդյան տոների առիթով: Այնուհետեւ Մայր Աթոռ Սուրբ Էջմիածնի Հայեցակարգային հարցերի գրասենյակի տնօրեն Տ. Բագրատ եպիսկոպոս Գալստանյանը խոսքով դիմեց երիտասարդներին` նշելով, որ նրանց բազմաքանակ ներկայությունը Մայր Աթոռում նոր լիցք ու զգացումներ է հաղորդում բոլորին` շարունակելու իրենց աստվածահաճո կյանքը եւ կերտելու հայ ժողովրդի լուսավոր ու պայծառ ապագան:
Միջոցառումը հոգեւոր ու ազգային երգերի գեղեցիկ կատարումներով զարդարեց Գեւորգյան հոգեւոր ճեմարանի երգչախումբը:
Ապա երիտասարդներին իր հայրապետական օրհնությունն ու գնահատանքը բերեց Գարեգին Բ-ն: Նա մաղթեց, որ 2014 թվականը երիտասարդների համար լինի ուրախության, բերկրանքի ու հաջողությունների տարի: Գարեգին Բ-ն նշեց, որ Աստծո օրհնությունն ունենալով` երիտասարդները պետք է ջանքեր գործադրեն, որպեսզի նոր տարին լինի օրհնության տարի ինչպես յուրաքանչյուր հայ անհատի, այնպես եւ ամբողջ հայ ազգի ու մարդկության համար: Ամենայն Հայոց Հայրապետը հորդորեց երիտասարդներին օգտագործելու համայն հայության հոգեւոր կենտրոն այցելության այս առիթը` աղոթք բարձրացնելու Մայր Տաճարում եւ վերանորոգելու իրենց ուխտն Աստծո հետ, քայլելու Տիրոջ պատվիրանների համաձայն եւ իրենց եկեղեցասեր ու ազգանվեր կյանքով նպաստելու Հայրենիքի առաջընթացին ու ժողովրդի բարօր ապագայի կառուցմանը:
Հանդիպման ավարտին Վեհափառ Հայրապետը պատասխանեց նաեւ երիտասարդների հարցերին, որոնք վերաբերում էին 2015 թվականին Հայոց Ցեղասպանության 100-ամյա տարելիցին ընդառաջ Եկեղեցու կողմից տարվող աշխատանքներին, Ցեղասպանության զոհերի սրբադասմանը, Ամենայն Հայոց Կաթողիկոսության եւ Մեծի Տանն Կիլիկիո Կաթողիկոսության համագործակցությանը, Եկեղեցու քարոզչական գործունեությանը, սիրիահայ համայնքի ներկա կացությանը եւ սիրիահայությանը ցուցաբերվող զորակցությանը, բանակում իրականացվող հոգեւոր սպասավորությանը եւ եկեղեցի-պետություն հարաբերություններին: