Հայաստանում վերջերս սիրիահայերի խնդիրներով հետաքրքրվածությունը նվազել է, հունվարի 13-ին կայացած մամուլի ասուլիսում հայտարարել է Դուբայի մամուլի ակումբի անդամ, www.azad-hye.net կայքի հիմնադիր-գլխավոր խմբագիր Հրաչ Կալսահակյանը:
Ըստ նրա՝ Հայաստանի սփյուռքի նախարարությունում հունվարի 13-ին, ժ. 17:00-ին իրենց նախաձեռնությամբ կկայանա գերատեսչության ղեկավարի հետ հանդիպում՝ սիրիահայերին մտահոգող խնդիրների ներկայացման համար:
«Կայքի հիմնական նպատակը Սիրիայից եւ ամբողջ Մերձավոր Արեւելքից ստացվող տեղեկատվությունը ճիշտ հունի վրա դնելն է, որպեսզի այդ տեղեկությունը հայերի միջոցով ստացվի, քանի որ հայ լրագրողների համար նախընտրելի է այդ դեպքերի մասին իմանալ հայերից», - նշել է Կալսահակյանը՝ հավելելով, որ արտասահմանյան լրատվամիջողներից ստացվող տեղեկությունների հիմնական մասը չափազանցություն է: Նա նշել է, որ նաեւ սիրիահայերին օգնելու հարցն է դրված:
«Մենք գիտենք, որ սիրիահայերը նյութական օգնության կարիք ունեն: Մեր կայքի տարածած հավաստի տեղեկատվությունը կօգնի, որպեսզի օգնությունը նպատակաուղղված լինի», - ընդգծել է Կալսահակյանը:
Անդրադառնալով Քաղաքացիական հասարակության կենտրոնին, Հայաստանում խոսքի եւ մամուլի ազատությանը՝ նա նշեց, որ նպատակը լրագրողներին սփյուռքի կյանքին ծանոթանալու հնարավորություն ընձեռելն է: «Կենտրոնի եւ Լրագրողների միջեւ համագործակցությունը կարող է շատ հնարավորություններ եւ փոխգործակցության համար որոշակի հարթակ ստեղծել Կենտրոնի եւ լրագրողների համար: Կան երկու հիմնական գաղափարներ. արվեստի նոր հայ գործիչների մասին տեղեկատվության տարածում, ինչպես նաեւ հրապարակումների հետ կապված որոշակի աշխատանքի կատարում, որպեսզի օտարերկրյա ընթերցողները կարողանան ծանոթանալ Հայաստանի դեպքերին»,- ամփոփել է Հրաչ Կալսահակյանը:
Լուրեր Հայաստանից - NEWS.am