Հունվարի 13-ին ՀՀ սփյուռքի նախարարությունում տեղի է ունեցել սիրիահայ Ֆեյսբուքյան խմբերի պատասխանատուների եւ ներկայացուցիչների հանդիպում-քննարկում «Սիրիահայության տագնապը լուսարձակի տակ» թեմայով:
Բացման խոսքով հանդես եկավ «Հալեպահայեր» ֆեյսբուքյան խմբի («ARMENIANS OF ALEPPO») հիմնադիրներից բժիշկ Ռոբերտ Սյուլահյանը, նա կարեւորեց ֆեյսբուքյան խմբերի դերը սիրիահայության հիմնախնդիրների եւ դրանց լուծման, սիրիայի հայ համայնքի, սիրիական պատերազմին վերաբերյալ օբյեկտիվ տեղեկատվության տարածման հարցում եւ շնորհակալություն հայտնեց ՀՀ սփյուռքի նախարարությանը, ինչպես նաեւ «Հայէկոնոմ» բանկին՝ քննարկում-հանդիպման կազմակերպմանն աջակցելու համար:
ՀՀ սփյուռքի նախարար Հրանուշ Հակոբյանը շնորհակալություն հայտնեց այն սիրիահայերին, ովքեր մնացել են Սիրիայում, պայքարում եւ պահպանում են համայնքը, ապա ներկայացրեց պետության կողմից սիրիահայերի համար տարվող աշխատանքները:
Նախարար Հրանուշ Հակոբյանը ֆեյսբուքյան նախաձեռնությունների ներկայացուցիչներին առաջարկեց մասնակցել ամիսը մեկ անգամ հրավիրվող սիրիահայերի հիմնախնդիրները համակարգող միջգերատեսչական մարմնի նիստերին, լինել առավել տեղեկացված եւ օբյեկտիվորեն ու անաչառ կերպով ներկայացնել կատարվող աշխատանքները:
ՀՀ սփյուռքի նախարարության Մերձավոր եւ Միջին Արեւելքի հայ համայնքների հետ կապերի վարչության պետ Լ. Ստեփանյանը ներկայացրեց սիրիահայերի իրավական, սոցիալական, առողջապահական, կրթական խնդիրների ուղղությամբ Հայաստանում իրականացվող աշխատանքները:
Ֆեյսբուքյան «Հալեպահայեր» խմբի ղեկավար Հրաչ Քալսահակյանը ներկայացրեց սիրիական հիմնախնդրի վերաբերյալ համընդհանուր լուրերի շրջանակից սիրիահայությանն առնչվող լուրերը առանձնացնելու եւ դրանք վերլուծելու ու նպաստավոր ձեւով ներկայացնելու մոտեցումը: Նա նշեց, որ տեղեկատվական պատերազմում ոլորտի ներկայացուցիչները պետք է տարբերակեն լրատվական այն հոսքերն ու մեխանիզմները, որոնք կարող են վնասել սիրիահայությանը, բացառելով երեւակայական մեկնաբանությունները, անստույգ տեղեկություններն ու անճշտությունները: Հրաչ Քալսահակյանը նշեց. «Ժամանակն է, որ մենք եւ՛ Հայաստանում, եւ՛ արտերկրում իրականացվող աշխատանքների վերաբերյալ քաջատեղյակ լինենք: Ապատեղեկատվությունը մեծապես կարող է վնասել սիրիահայերի ինտեգրմանը: Արհեստավարժ մոտեցում պետք է ցուցաբերել եւ ներկայացնել սիրիահայությանը ցուցաբերվող օգնության վերաբերյալ ստույգ եւ օբյեկտիվ տեղեկատվություն, ստացվող օգնությունների չափերն ու դրանց բաշխման մեխանիզմները՝ խուսափելով տարաբնույթ անհարկի մեկնաբանություններից, որոնք հաճախ սեպ են խրում հայության տարբեր հատվածների մեջ»:
«Հալեպահայեր» ֆեյսբուքյան խմբի ներկայացուցիչ, Լոնդոնաբնակ Թալին Մակարյանը ներկայացրեց Սիրիայի հայ համայնքի սոցիալ-հոգեբանական ծանր վիճակն այսօր, նրանց խնդիրները լուծելու ուղղությամբ տարված աշխատանքները :
Լիբանանում հանգրվանած սիրիահայերի վիճակը եւ նրանց հիմնախնդիրների լուծման ուղղությամբ տարվող աշխատանքները ներկայացրեց Արաքսի Փիլավճյան-Խտրլարյանը (Բեյրութ):
Վազգեն Բերղուդյանը ընթերցեց ֆեյսբուքում տեղ գտած այն հրապարակումները, որոնցում արծարծվում է սիրիահայությանը հուզող խնդիրները:
Միջոցառման մասնակիցների հնչեցրած հարցերին պատասխանեցին Սփյուռքի նախարար Հրանուշ Հակոբյանը եւ միջգերատեսչական հանձնաժողովի անդամները:
Հավաք-քննարկման ընթացքում քննարկվեցին ԶԼՄ-ներում եւ սոցիալական ցանցերում սիրիահայության մասին ճշգրիտ տեղեկատվության տարածմանը վերաբերող հարցեր: