Կանգնել արցախցու կողքին, աջակցել վերաբնակեցման ծրագրերին եւ նպաստել Արցախի զարգացմանն ու վերածննդին: Հենց այս նպատակով եւ բացառապես հայրենասիրական սկզբունքներից ելնելով երեք տարի առաջ «ԱՐԻ» (Artsakh Roots Investment) կազմակերպությունը որոշեց ներդրումներ կատարել Արցախում: Երեք տարի առաջ մեկնարկած առաջին ծրագրում շուրջ 100 գործարարներ Քաշաթաղի շրջանի 800 վերաբնակչի գյուղատնտեսական եւ անասնապահական ծրագրերի իրականացման համար վարկեր տրամադրեցին. արդյունքում` վերամշակված 6.000 հա հողատարածքով եւ շուրջ 2.000 գլխաքանակ եղջերավոր անասուններով Քաշաթաղն այսօր
հանդիսանում է երկրի գյուղատնտեսական կենտրոններից մեկը: «Արցախցիների, ԼՂՀ նախագահի ու վարչապետի հետ հանդիպումների ժամանակ հասկացանք, որ ապրուստի միջոց տրամադրելուն զուգահեռ անհրաժեշտ է հոգալ նաեւ վերաբնակիչների բնակարանային խնդիրները, ստեղծել հարմարավետ եւ նպաստավոր պայմաններ ապրելու եւ աշխատելու համար: Հենց այդ նպատակով սփյուռքահայ 57 գործարարի ուշադրության կենտրոնում հայտնվեց Արցախի դարպաս հանդիսացող Քաշաթաղ շրջանի Աղավնի գյուղն ու որոշում կայացվեց այնտեղ փոքրիկ ավան կառուցել: Բարեսիրությամբ հողատարածք չի վերաբնակեցվի և տնտեսություն չի զարգանա: Արցախի կառավարության հետ համագործակցության շնորհիվ կարողացանք լիբանանցի գործարարներին համոզել, որ փոխանակ օտար ափերի, ներդրումներ կատարեն հայրենիքում»,- «Արմենպրես»-ի հետ զրույցում ասաց «ԱՐԻ»-ի գործադիր փոխտնօրեն, լիբանանահայ Բենիամին Բչաքչյանը` նշելով, որ բնակարանների կառուցման համար արդեն հավաքվել է 2 մլն դոլար:
Լիբանանահայ գործարարների այս նախաձեռնությունը ոգեւորել է նաեւ սփյուռքի այլ գաղթօջախներում բնակվող գործարարներին եւ Աղավնիի շինարարական աշխատանքներին մասնակցելու ցանկություն են հայտնել նաեւ արաբական այլ երկրների եւ Ֆրանսիայի հայ գործարարները: Ծրագիրն այժմ նախապատրաստական փուլում է. մարտից նախատեսվում է գյուղի առաջին 50 բնակարանների շինարարությունը: Շինարարական առաջին փուլը կավարտվի աշնանն ու ազդակ կհանդիսանա հաջորդ երկու փուլերով եւս 100 բնակարանների կառուցման համար: «Հայրենիքը միայն հեռվից սիրելը շատ հեշտ գործ է, սակայն իսկական սերն ու հայրենասիրությունն այլ է. թեկուզ փորքիկ ներդրումով նպաստել հայրենիքի զարգացմանը: Սա է մեր գաղափարախոսությունը: Նպաստելով վերաբնակեցման ծրագրին, մենք նոր շունչ ենք տալիս Արցախին, երկարացնում նրա կյանքը: Սա միայն վերաբնակեցման ծրագիր չէ, սա շատ ավելի հեռահար գաղափար է: Հայը հաստատվում է ազատագրված Արցախում, իսկ Արցախն ուժեղ է, քանի այնտեղ ապրում է հայությունը: Վերջին երկու տարվա ընթացքում բազմաթիվ սիրիահայեր են հաստատվել Արցախում եւ նրանցից շատերն արդեն ցանկություն են հայտնել նորակառույց ավանում տուն գնել»,- ասաց Բչաքչյանը` հավելելով, որ Քաշաթաղի շրջանը վերաբնակեցման համար շատ նպաստավոր է: Հողը բարեբեր է, եղանակը` նպաստավոր, ջուրը` մշտական. հետեւաբար նոր ավանի կառուցումը միայն կնպաստի տարածաշրջանի զարգացմանը:
Ավանի կառուցումից հետո ԼՂՀ կառավարությունը հիպոթեքային ցածր տոկոսադրույքներով կամ սոցիալական այլ ծրագրերի միջոցով կիրականացնի վերաբնակեցման ծրագիրը: ԼՂՀ փոխվարչապետ Արթուր Աղաբեկյանի խոսքերով` այս կերպ Արցախում կձեւավորվի նաեւ հիպոթեքային շուկա: «Կառավարության ծրագիրն այնպիսին է, որ վերաբնակիչների համար թե' տոկոսադրույքը, թե' մարման գրաֆիկը շատ մատչելի եւ ձեռնտու լինի: Պետք է ամեն ինչ անել, որպեսզի մարդիկ ցանկանան ապրել Արցախում: 10-15 տարի առաջ, երբ իրականացվում էր վերաբնակեցման ծրագիր, տրամադրվող տներն ընդամենը տանիք էին ցրտից պատսպարվելու համար, իսկ այսօր ստեղծվում են բոլոր պայմանները, որպեսզի հաստատվելով Արցախում վերաբնակիչն ունենա թե' կայուն եկամուտ, թե' բնակարան: Վստահ եմ, որ ծրագրից օգտվողները շատ կլինեն եւ այս ծրագիրը ազդակ կհանդիսանա, որպեսզի այլ գաղաթօջախների մեր բարերաները նույնպես ներդրումներ կատարեն հայրենի հողում»,- ասաց Արթուր Աղաբեկյանը: Սա Արցախում իրականացվելիք վերաբնակեցման միակ ծրագիրը չէ: Հաջորդ շաբաթ ԼՂՀ փոխվարչապետ Արթուր Աղաբեկյանի հետ զրույցում «Արմենպրես»-ը կներկայացնի Արցախում իրականացված եւ իրականացվելիք վերաբնակեցման այլ ծրագրերի մասին:
Հասմիկ Հարությունյան, ARMENPRESS.am