Թուրքիայի գլխավոր ընդդիմադիր «Ժողովրդա-հանրապետական» (CHP) կուսակցության փոխնախագահ Սեզգին Թանրըքուլուն երկրի խորհրդարանին առաջարկ է ներկայացրել, որով պահանջվում է Շիշլիի շրջանում գտնվող փողոցներից մեկը վերանվանել է Հրանտ Դինքի անունով։
Թուրքական Vatan պարբերականի փոխանցմամբ՝ CHP-ի փոխնախագահ Սեզգին Թանրըքուլուն Շիշլիի շրջանի սահմաններում գտնվող փողոցներից մեկը Հրանտ Դինքի անունով կոչելու համար գրավոր առաջարկը ներկայացրել է խորհրդարանի նախագահությանը։
Առաջարկի մեջ պահանջվում է փոփոխություններ կատարել Ստամբուլի քաղաքապետարանի մասին օրենքում, որի արդյունքում հնարավոր կլինի Շիշլիի փողոցներից մեկը վերանվանել Դինքի անունով։
Նշենք, որ CHP-ն նախկինում եւս նման առաջարկներ արել էր, սակայն իշխող «Արդարություն եւ զարգացում» կուսակցության անդամների կողմից այն մերժվել էր։
Հիշեցնենք, որ ամեն տարի Դինքի սպանության տարելիցին սգո միջոցառման մասնակիցները հանում են «Էրգենեկոն» պողոտայի ցուցանակը եւ ամրացնում «Հրանտ Դինքի» պողոտա ցուցանակը։