Հունվարի 20-ին Ստոկհոլմի «ԱԲՖ» կենտրոնում տեղի ունեցավ Հրանտ Դինքի հիշատակին նվիրված երեկո: Այն կազմակերպվել էր Շվեդիայի հայկական ասոցիացիաների միության, Թուրքիայում մարդու իրավունքների պաշտպանության շվեդական կոմիտեի, Ստոկհոլմի «ԱԲՖ» կենտրոնի, Շվեդական լրագրողական ասոցիացիայի և Շվեդական «ՓԷՆ» ակումբի «Գրողների միջազգային կազմակերպության շվեդական կենտրոնի» կողմից:
Երեկոյին մասնակցեցին և ելույթներով հանդես եկան նաև Շվեդիայի խորհրդարանի պատգամավորներ, Շվեդական լրագրողական ասոցիացիայի և Շվեդական «ՓԷՆ» ակումբի ղեկավարներ:
Երեկոյի պատվավոր հյուրն էր թուրք անվանի մտավորական, իրավապաշտպան Ռագըփ Զարաքօլուն, ով ներկայումս ապաստան է գտել Շվեդիայում:
Իր ելույթի խոսքում Շվեդիայում ՀՀ դեսպան Արտակ Ապիտոնյանը, մասնավորապես, ասաց. «Հրանտ Դինքի անունը ջերմ զգացմունքներ է արթնացնում իր ընկերների և հետևորդների սրտերում, մարդկանց սրտերում, ովքեր պայքարում են ազատության և հավասարության համար և ընդդեմ խտրականության և անհանդուրժողականության, սովորական մարդկանց սրտերում, ովքեր չեն կարող ապրել առանց մարդկային արիության և հեռատեսության փայլուն օրինակների: Ես հպարտ եմ Դինքի և Զարաքոլուի նման արի մարդկանց ժամանակակիցը լինելու համար. մարդկանց, ովքեր կառուցել և շարունակում են կառուցել կամուրջ, որով դեռ ցավոք քչերն են համարձակվում անցնել: Սակայն դա է ապագայի կամուրջը, ուր արդարության և հաշտեցման ճանապարհին կհանդիպեն երկու ժողովուրդները: Երեկ Ստամբուլում Հրանտ Դինքի հիշատակը ոգեկոչող և արդարություն պահանջող տասնյակ հազարավոր մարդկանց հավաքը հույս է ներշնչում, որ այդ մարդկանց ու նրանց սատարողների ձայնն ու հաստատակամությունը մի օր արդարություն կվերահաստատեն` հանուն մեր ազգերի և ամբողջ տարածաշրջանի խաղաղ և ներդաշնակ ապագայի»:
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐՏԱՔԻՆ ԳՈՐԾԵՐԻ ՆԱԽԱՐԱՐՈՒԹՅՈՒՆ