Հակահայկական արտահայտությունով մեծ աղմուկ հանած KCK-ի (Քուրդիստանի հասարակությունների խորհուրդ, PKK-ի անվանափոխված տարբերակ-խմբ) կին համանախագահ Բեսե Հոզաթ հանդես է եկել պարզաբանմամբ։ Նա ավելի վաղ հայտարարել էր, թե հայերը եւ հույները Թուրքիայում զուգահեռ պետություն ունեն եւ խանգարում են Թուրքիայի ժողովրդարացմանը:
Քրդական Firat գործակալության փոխանցմամբ՝ Բեսե Հոզաթը պատասխանել է իր նախորդ հարցազրույցի հետ կապված արձագանքներին՝ նշելով, թե ինքը լավ տեղյակ է, որ հայ ժողովուրդը 1915-ին ցեղասպանության եւ բռնի տեղահանության է ենթարկվել։ «Երբ նայում ես հրեաների պատմությանը, տեսնում ես, որ կոտորածներով լեցուն պատմություն է, երբ նայում ես հայ ժողովրդի պատմությանը, կրկին կոտորածներով լեցուն պատմություն է։ Հույներն էլ նույն վիճակում են, ասորիները՝ նույնպես։ Քրդերի պատմությունն էլ կոտորածների պատմություն է։ Այդ համատեքստում մշտապես կոտորածների եւ ճնշման ենթարկված ժողովուրդների մոտ հոգեբանական ռեֆլեքսներ եւ եւ զգայունություն են զարգանում։ Նրանք շատ զգայուն են դառնում։
Իմ նախորդ հարցազրույցում ես ժողովուրդներին նկատի չեմ ունեցել։ Երբ ասել եմ ազգայնական կամ լոբբի արտահայտությունները, ես դրանց ոչ հայ ժողովրդի, ոչ էլ հույն ժողովրդի հետ չեմ ասոցացրել։ Իմ նշած խումբը համաշխարհային կապիտալի եւ կապիտալիստական ուժերի հետ համատեղ շարժվող, նրանց քաղաքականության հետ մերձեցած եւ այդ համատեքստում քաղաքականություն վարող կապիտալիստական ժամանակակից ուժեր են։ Նման ուժեր քրդերի մեջ էլ կան։ Սրանից հետեւություն, որ մենք ժողովուրդներին նկատի չենք ունեցել։
Մենք 40 տարի է՝ ժողովուրդների ազատության համար ենք պայքարում։ Քրդերի ազատության պայքարը ինչքան որ քրդեր համար է, այն նույնքան հայերի, ասորիների, հույների եւ հրեաների համար է։ PKK-ն ժողովուրդներին սիրող շարժում է։ Նրա գաղափարը՝ ժողովրդական գաղափար է՝ ժողովուրդների դեմոկրատական, ազատ, հավասաար կյանքի գաղափար է։ Այս համատեքստում PKK-ն տարիներ ի վեր այս ամենի համար է պայքարում, ժողովուրդների ազատության համար է պայքարում։
Քուրդ, հայ, ասորի եւ հրեա ժողովուրդներն այս տարածաշրջանի բնիկ ժողովուրդներն են։ Նրանք Մերձավոր Արեւելքում հազարավոր տարիներ միասին են ապրել։ Այս ժողովուրդների միջեւ երբեք խնդիրներ չեն ծագել։
Բայց համաշխարհային ուժերը, կապիտալիստական ուժերը, նրանց ստեղծած խմբավորումները երբեք չեն ցանկացել քրդական հարցի կարգավորումը։ Եթե քրդական հարցը կարգավորվի, Թուրքիան կժողովրդավարանա, տարածաշրջանը կժողովրդավարանա։
Ես հարգում եմ Հրանտ Դինքի հիշատակը։ Նա արժեքավոր հայ հայրենասեր էր եւ քրդերի բարեկամ։ Տարիներ ի վեր նրա տված պայքարը նաեւ PKK-ն է տվել ավելի ուժեղ ձեւով։ Դրա համար պետք է նրա անունը պայքարի հետ վառ պահել։
Իհարկե, PKK-ն էլ Հրանտ Դինքի պես միշտ պայքարել է հայ ժողովրդի ազատության, ժողովրդավարական արժեքների համար, ժողովուրդների համար։ Այդ համատեքստում PKK-ն փորձել է իրականացնել Դինքի երազանքը։ Սրանից հետո եւս նույնն է լինելու։
Արամ Տիգրանն էլ քրդերի արժեքավոր բարեկամն էր, շատ արժեքավոր հայ հայրենասեր։ Այս ինքնություններն են ներկայացնում հայ ժողովրդին, ներկայացնում նրա արժեքները։ PKK-ն տեր է կանգնում այդ ինքնություններին, այդ արժեքներին։ Մենք այս ամենին նման իմաստ ենք տալիս»,-հայտարարել է Բեսե Հոզաթը։
Նշենք, որ որ Բեսե Հոզաթը ասել է, թե Թուրքիայում պաշտոնական պետությունից բացի կան նաեւ զուգահեռ պետություններ՝ օրինակ բերելով, որ Գյուլենի շարժումը զուգահեռ պետություն է։ «Հրեական լոբին, ազգայնական հայերը եւ հույները նման մեկական զուգահեռ պետություններ են։ Նման զուգահեռ պետությունները միմյանց հետ կապի մեջ են եւ շահեր ունեն միմյանցից։ Զուգահեռ պետությունները չունեն պաշտոնական եւ սահմանադրական իրավունքներ, ինչպես երեւում է չունեն նաեւ զորք, բայց ունեն կազմակերպված եւ ուժեղ կառույց»,-ասել է քուրդ կին զինյալը՝ պնդելով, թե այդ զուգահեռ պետությունները Թուրքիայում ժողովրդավարություն հաստատմանը խանգարում են։
Բեսե Հոզաթին խիստ քննադատության են ենթարկել թուրք եւ քուրդ մտավորականներ, «Ակոս» պարբերականի խմբագիրները, Taraf պարբերականի հայ լրագրող Հայկո Բաղդատը, T24.com.tr կայքը եւ HDP-ի համանախագահները։