Թուրքական հետազոտությունների ինստիտուտի ներկայացուցիչ Էդվարդ Էրիքսոնը Ջորջթաունի համալսարանում դասախոսության ժամանակ կոպիտ պատասխաններ է տվել Ամերիկայի հայ դատի գրասենյակի ներկայացուցչի հարցերին Հայոց ցեղասպանության վերաբերյալ իր դիրքորոշման մասին եւ թուրքական կառավարության ու կազմակերպությունների միջեւ կապերի մասին: Այդ մասին NEWS.am-ին հաղորդել են Ամերիկայի հայ դատի գրասենյակի մամուլի ծառայությունից:
«Կարո՞ղ ենք նրանք դուրս հրավիրել»,- հայտարարել է դոկտոր Էրիքսոնը ի պատասխան ԱՀԴԳ ներկայացուցիչ Քեյթ Նահապետյանի այն հարցի, թե արդյոք հավատում է նա, որ 1,5 մլն հայերի սպանությունը ցեղասպանություն էր: «Սա Թուրքիան չէ»,- հակադարձել է Նահապետյանը՝ նշելով, որ նրանք, ում դիրքորոշումը դասախոսը չի կիսում, ԱՄՆ-ում չեն կարող պարզապես խլացվել:
Վկայակոչելով դոկտոր Էրիքսոնի պնդումը, որ պատմությունն ունի իր օրակարգը, որ «ռեսուրսներն ուղղորդում ու քաղաքականություն են որոշում», ԱՀԴԳ-ի գործադիր տնօրեն Արամ Համբարյանը խնդրել է նրան մեկնաբանել Թուրքական հետազոտությունների ինստիտուտի կապտ Թուրքիայի կառավարության ու ցեղասպանության ժխտման նրա քաղաքականության հետ: Էրիքսոնը խոստովանել է, որ ինստիտուտը հիմնվել է թուրքական կառավարության կողմից տրամադրված գրանտի հաշվին, սակայն պնդել է, որ «ինստիտուտը սահմանափակված չէ, Թուրքիայի կառավարության խամաճիկը կամ մարմինը չէ: Այն գործում է որպես առանձին իրավաբանական անձ, սեփական որոշումներն է կայացնում, նրա օրակարգը ոչ մի ընդհանրություն չունի որեւէ հայկականի կամ ցեղասպանության ժխտման հետ»:
Նահապետյանը վիճարկել է պնդումը, դոկտոր Էրիքսոնին ու ներկաներին հիշեցնելով, որ ինստիտուտի նախկին նախագահ Դոնալդ Քվոթերթը Ցեղասպանության ժխտման համար ստիպված էր հրաժարվել պաշտոնից ԱՄՆ-ում Թուրքիայի դեսպան Նաբի Շենսոյի հետ հանդիպումից հետո: «Դեսպանը հասկացնել տվեց, որ եթե չհեռանամ տնօրենների խորհրդի նախագահի պաշտոնից, ինստիտուտի ֆինանսավորումը կդադարեցվի եւ ինստիտուտը կդադարի գոյություն ունենալուց»,- մի անգամ պատմել է Քվոթերթը:
«Ամերիկայի ձայնի» լրագրող Արսեն Խառատյանը եւ այլ մասնակիցներ հարցեր են տվել, հայտնելով իրենց մտահոգությունը դոկտոր Էրիքսոնի գիտականության մասին եւ Թուրքիայի՝ ցեղասպանության ժխտման միջազգային կազմակերպության հետ կապերի մասին: Ամենաառեղծվածային նրա պատասխանն էր կրկին հնչած հարցին հայերի ցեղասպանության վերաբերյալ, երբ Էրիքսոնը նշել է. «Լինում են օրեր, երբ արթնանում եմ ու մտածում. «Հավանաբար, դա ցեղասպանություն էր»: Սակայն լինում են օրեր, երբ արթնանում ու մտածում եմ. «Հավանաբար՝ ոչ»: