Հրեական Հոլոքոստի օրինակով Հայաստանը պետք է կիրառի «եղեռն» տերմինը որպես ցեղասպանության հոմանիշ, կարծում է քաղաքագետ Ալեքսանդր Մանասյանը։
«Առավոտ» թերթը մեջբերում է երկուշաբթի մամուլի ասուլիսում Ալեքսանդր Մանասյանի կատարած ձևակերպումը. «Օբաման կանգ առավ եղեռն բառի վրա: Բայց սա լավ առիթ է, որ եղեռնը շրջանառության մեջ դնեինք ու ցեղասպանություն բառն ունենար իր հոմանիշն, այնպես, ինչպես հրեաների մոտ է»։
ԱՄՆ նախագահ Բարաք Օբաման ամեն տարի ապրիլի 24–ին` Հայոց ցեղասպանության զոհերի հիշատակի օրը, ելույթ է ունենում հայ ժողովրդին ուղղված ուղերձով` 1915 թվականի իրադարձությունները կոչելով «Մեծ Եղեռն»։
Մանասյանի խոսքով` հայերը կարող են դա անել, որովհետեւ ոչ մի ժողովուրդ սեփական հայրենիքում չի ցեղասպանվել ու «փոխանակ շատ խնդրեինք Օբամային, պետք է շրջանառության մեջ դնենք նրա արտաբերած բառը»:
Այս կապակցությամբ նա բարձրացրել է ևս մեկ կարևոր հարց` այն կարծիքի վերացումն է, թե Հայոց ցեղասպանությունն իրականացվել է ոչ թե Թուրքիայի, այլ Օսմանյան կայսրության կողմից։ «Մենք պետք է ցույց տանք, որ ցեղասպանությունը եղել է ոչ միայն 15 թվականին, այլ ցույց տանք նաև այն, որ գործընթաց է եղել և շարունակվել ու շարունակվում է առայսօր»,– քաղաքագետի խոսքն է մեջբերում թերթը։
«Հայելի» մամուլի ակումբի կայքը ներկայացնում է Մանասյանի` թուրք վարչապետ Ռեջեփ Թայիփ Էրդողանին Գերմանիայի կանցլեր Անգելա Մերկելի` հայ–թուրքական սահմանի բացելու մասին կոչի վերաբերյալ մեկնաբանությունը։ «Եվրոպան վախենում է, որ ցեղասպանության հանցագործությունը չընդունած մի հանցագործ հանկարծ կդառնա եվրոպական ընտանիքի անդամ»,– նշել է Մանասյանը։
Քաղաքագետի խոսքով, Եվրոպան վտանգավոր է համարում այդպիսի անցյալ ու վարքուբարք ունեցող Թուրքիայի անդամակցությունը եվրոպական ընտանիքին։ Բացի այդ, ըստ նրա, Եվրոպան զգուշանում է Թուրքիայի անդամակցումից ԵՄ–ին նաև վերջինի մեծաքանակ բնակչության և դրա ժողովրդագրական վարքի առանձնահատկությունների պատճառով։ «Եվրոպական կառույցներում թուրքերը ներկայացուցիչներ կունենան բնակչության թվին համապատասխան»,– կայքը մեջբերում է քաղաքագետի խոսքը։
A1+ պորտալը բերում է Անգելա Մերկելի կոչի ևս մեկ հնարավոր պատճառ, որ նշել է Ալեքսանդր Մանասյանը։ Նա կարծում է, որ հետաձգելով Թուրքիայի անդամակցումը ԵՄ–ին, եվրոպական հանրությունը հույս ունի ստիպել նրան ճանաչել Հայոց ցեղասպանությունը և դրանով իսկ առաջընթացի հասնել թուրքական հասարակության գիտակցությունում, «և թուրքերը կդադարեն ցեղասպան համարվել»։
Թուրքական ԶԼՄ–ների տվյալներով, փետրվարի 7–ին Գերմանիայի կանցլեր Անգելա Մերկելը Թուրքիայի վարչապետ Ռեջեփ Թայիփ Էրդողանի հետ հանդիպմանը հայտարարել է, որ Անկարան պետք է առերեսվի իր պատմության հետ Հայոց ցեղասպանության հարցում, ինչպես նաև բացի Հայաստանի հետ սահմանը։ Կանցլերն այդ մասին հայտարարել է Էրդողանի` Հայոց ցեղասպանության մոտեցող 100–ամյակի հարցում զգույշ լինելու նախազգուշացումից հետո։
ar.newsarmenia.ru