Ճապոնացի վարպետ Յամադա սենսեյը մարտի 1–2–ը Երևանում կանցկացնի կիմոնոյի ցուցադրություն, իկեբանա պատրաստելու և սումի–է նկարելու տեխնիկայի վարպետության դասընթացներ, «Նովոստի–Արմենիա» գործակալությանը տեղեկացրել է «Հիկար» հայ–ճապոնական գիտակրթական մշակութային կենտրոնի փոխնախագահ Լուսինե Թանգյանը։
«Ճապոնիայի դեսպանատան, «Հիկար» կենտրոնի և Հայաստանի գեղագիտության ազգային կենտրոնի կողմից կազմակերպված միջոցառումները տեղի կունենան Հայաստանի նկարիչների միությունում», – ասել է նա։
Միջոցառման բացման արարողությունը տեղի կունենա մարտի 1–ին ժամը 17։00–ին, ինչից հետո տեղի կունենա իկեբանա պատրաստելու վարպետության դասընթացը։ Հաջորդ օրը առավոտյան կանցկացվի սումի–է նկարելու ճապոնական տեխնիկայի վարպետության դասընթացը, ցերեկը տեղի կունենա ճապոնական թեյախմության արարողություն, իսկ նույն օրը երեկոյան` ճապոնական կիմոնոյի ցուցադրություն։
«Մեր կենտրոնն արդեն երրորդ տարին նման միջոցառումներ է կազմակերպում, սակայն Յամադա սենսեի կողմից հատուկ Ճապոնիայից բերված կիմոնոների ցուցադրություն մենք առաջին անգամ ենք կազմակերպում», – նշել է Թանգյանը։
Նա նաև տեղեկացրել է, որ ինչպես միջոցառման, այնպես էլ վարպետության դասընթացների մուտքն ազատ է, սակայն վարպետության դասընթացների համար հարկավոր է նախապես գրանցվել։
Սումի-է-ն տուշով նկարված նկարն է: Այն նաև անվանում են սույբոկուգա (ջրով և տուշով արված նկար): Այն սև-սպիտակ գեղանկարչություն է` սև տուշով իրականացված (սումի): Ճապոնիայում այդ արվեստը հայտնվել է 13-րդ դարի կեսերին: Այն Ճապոնիա է հասել Չինաստանից:
ar.newsarmenia.ru