Հայ ռեժիսոր Արա Արուշի «Որսորդ» կարճամետրաժ ֆիլմը լավագույնն է ճանաչվել Մանհեթենի միջազգային կինոփառատոնի «Լավագույն ֆիլմ» անվանակարգում, ասվում է ժապավենի` Facebook սոցիալական ցանցի էջում։
Փետրվարի 28–ից մարտի 2–ն անցկացված կինոփառատոնի այդ անվանակարգին մասնակցելու համար ներկայացվել էին 130 ռեժիսորի կարճամետրաժ ֆիլմեր, սակայն ընտրվել է միայն 12–ը։
«Որսորդ» ֆիլմը պատմում է ղարաբաղյան պատերազմի հերոս, հարբեցող Նելսոնի մասին, ով ապրում է խուլ գյուղերից մեկում։ Նրա կնոջ ու նորածին որդու միակ կերակրող կովին սպանում է սոված գայլը։ Իր հարուստ եղբոր մոտ փոխելով սեփական մեդալները երեք փամփուշտի` որսորդը գնում է որսի, որ երեք գայլի և եղջերվի մորթի ձեռք բերի, ինչի համար եղբայրը նրան նոր կով է խոստանում։ Նելսոնն այդ երեք փամփուշտներով գնում է անտառ որսորդության։
Ֆիլմի սցենարի հեղինակն Արա Արուշն է, բեմադրող օպերատորը` Վազգեն Մուրադյանը, կոմպոզիտորը ` Եվգենի Միլովանովը։ Ֆիլմի գլխավոր դերերը խաղացել են Արմեն Գրիգորյանը, Աննա Արուշը և Էդվարդ Շահնազարյանը։ Ժապավենում հերոսները շփվում են բանաստեղծական հանգով։
Կինոռեժիսոր, սցենարիստ, պրոդյուսեր Արա Արուշը (Առուշանյան) ծնվել է 1974 թվականին Ստեփանակերտում։ 1999 թվականից նկարահանել է հոլովակներ, հիմնել է Digidez Studio–ն և KenigArts Pictures։
Կաննի միջազգային կինոփառատոնից բացի, «Որսորդ» ֆիլմը ներկայացվել է նաև Մումբայի Ջագրան և Մերիլենդի «Ֆրեդերիկ» կինոփառատոներում, իսկ գլխավոր դերակատար Արմեն Գրիգորյանը «Լավագույն դերասան» պարգևի է արժանացել Իսպանիայի Բադալոնի կինոփառատոնում։
ar.newsarmenia.ru