Լիսաբոնում նախարար Հրանուշ Հակոբյանը, մարտի 6-ին հանդիպումներ է ունեցել «Գալուստ Կյուլպենկյան» հիմնարկության նախագահ Արթուր Սանթոս Սիլվայի, «Գալուստ Կյուլպենկյան» հիմնարկության հոգաբարձու, Գալուստ Գյուլբենկյանի ծոռ Մարտին Եսայանի, հիմնարկության հայկական համայնքների բաժանմունքի ղեկավար, դոկտոր Ռազմիկ Փանոսյանի եւ Պորտուգալիայի հայ համայնքի ներկայացուցիչների հետ:
Հանդիպումների ընթացքում քննարկվել են Գալուստ Գյուլբենկյանի 150-ամյակին նվիրված միջոցառումների, «Գալուստ Կյուլպենկյան» հիմնարկության հայկական համայնքների բաժանմունքների հետ Սփյուռքում եւ ՀՀ-ում կրթական, մշակութային, հետազոտական համատեղ ծրագրեր իրականացնելու, սիրիահայ ուսանողներին կրթաթոշակ տրամադրելու, երիտասարդ գիտնականների աջակցությանը վերաբերող հարցեր:
ՀՀ սփյուռքի նախարար Հրանուշ Հակոբյանն իր գոհունակությունն է հայտնել 2014-2017թթ. «Գալուստ Կյուլպենկյան» հիմնարկության հայկական համայնքների բաժանմունքների ծրագրերին՝ նշելով, որ դրանք Հայրենիք-Սփյուռք գործակցությանը, արեւմտահայերենի պահպանմանը եւ հայապահպանությանը միտված լավագույն քայլեր են: «Գալուստ Կյուլպենկյան» հիմնարկության հայկական համայնքների բաժանմունքի 2014թ.-ի աշխատանքներում բացի վերը նշված ծրագրերից, նախատեսվում է նաեւ աջակցություն ցուցաբերել ՀՀ-ում քաղաքացիական հասարակության ձեւավորմանը, ընդհանուր առմամբ հայաստանյան ծրագրերին տրամադրելով շուրջ 800 հազար ԱՄՆ դոլար:
Նախարարը այցելել է նաեւ «Գալուստ Կյուլպենկյանի» անվան թանգարան, ծանոթացել մեծ բարերարի հարուստ հավաքածուին, որտեղ տեղ են գտել արվեստի եւ մշակույթի արժեքավոր գործեր, մասնակցել է «Գալուստ Կյուլպենկյանիե անվան սիմֆոնիկ նվագախմբի համերգին, որի կազմում ընդգրկված են նաեւ երեք երիտասարդ երաժիշտ Հայաստանից:
ՀՀ սփյուռքի նախարարը «Գալուստ Կյուլպենկյան» հիմնարկության նախագահ Արթուր Սանթոս Սիլվային ՀՀ վարչապետի անունից հրավիրեց Հայաստան, ով սիրով ընդունեց հրավերը:
Հաջորդ օրը ՀՀ սփյուռքի նախարարն այցելել է Իսպանիայի Բարսելոնա քաղաք, որտեղ հանդիպումներ է ունեցել Հայաստանյայց Առաքելական սուրբ եկեղեցու Հայրապետական պատվիրակ, Իսպանիայի եւ Պորտուգալիայի ընդհանուր փոխանորդ Տ. Սասուն Ծ. Վրդ. Զմրուխտյանի, Բարսելոնայի հայկական մշակութային միության նախագահ Սեւադա Սահակյանի եւ հայ համայնքի այլ ներկայացուցիչների հետ:
Նախարարը ծանոթացել է Բարսելոնայի մեկօրյա վարժարանի աշխատանքներին, հանդիպել վարժարանի սաներին, ուսուցիչներին եւ վարժարանի տնօրինությանը: Հանդիպման ժամանակ Հրանուշ Հակոբյանը շնորհակալություն է հայտնել ուսուցիչներին իրենց նվիրումի եւ ազգապահպան գործի համար, ինչպես նաեւ իր մաղթանքներն է հղել Բարսելոնայի Հայկական Մշակութային միությանը՝ ծավալած գործունեության համար, հաջողություն մաղթել միության ծրագրերին եւ միջոցառումներին: Պայամանավորվածություն է ձեռք բերվել Բարսելոնայի Հայկական Մշակութային միության եւ ՀՀ սփյուռքի նախարարության հետ համատեղ ծրագրեր իրականացնելու հարցում: Նախարարը պատրաստակամություն է հայտնել աջակցել ապրիլի 18-19 Բարսելոնա քաղաքում կազմակերպվող «Եվրոպայի համահայկական 20-րդ խաղերինե:
Հայ համայնքի ներկայացուցիչների հետ հանդիպման ժամանակ ՀՀ սփյուռքի նախարարը ներկայացրել է Սփյուռքի նախարարության 5-ամյակում իրականացրած հիմնական ծրագրերը, խոսել 2014 թվականին իրականացվելիք ծրագրերի մասին:
Լուրեր Հայաստանից - NEWS.am