Հայ փաստաբանների ու իրավաբանների ու «Հիշողություն 2000» ասոցիացիայի պատվիրակությունը հանդիպել է Փարիզում Շվեյցարիայի դեսպանատան առաջին խորհրդական Ալեն Հաշենի ու դեսպանատան քաղաքական բաժնի ղեկավար Սելին Սկուարատիի հետ, փոխանցում է «Nouvelles d’Arménie»-ն:
Պատվիրակները Շվեյցարիայի կառավարության փոխանցել են գրություն՝ քննադատելով բացահայտ սխալ գնահատականները, սելեկտիվ փաստերը ու իրավական որոշումները, որոնք ՄԻԵԴ-ը կայացրել է 2013-ի դեկտեմբերի 17-ին: Ըստ այդմ, Շվեյցարիան խախտել է թուրք ազգայնական Դողու Փերինչեքի խոսքի ազատության իրավունքը: Իսկ Բերնար Ժուաննոն «Հիշողություն 2000» ասոցիացիայի անունից քննադատել է այդ որոշման խստությունը, որը հանգեցնում է 20-րդ տարի առաջին երկու ցեղասպանությունների զոհերի միջեւ մրցակցությանը ու ճանապարհ է հարթում Գեյսսոյի՝ Հոլոքոստի հերքման համար դատապարտում նախատեսող օրենքի չեզոքացման համար:
Ինչպես ավելի վաղ NEWS.am-ն էր հաղորդել, Հայկական հարցի վերաբերյալ ֆրանսիական բյուրոյի ու Ֆրանսիայի հայկական կազմակերպությունների համակարգող խորհրդի համատեղ պատվիրակությունը Շվեյցարիայի դեսպանատանը հանդիպել է դեսպանի առաջին խորհրդականի ու դեսպանատան քաղաքական բաժնի ղեկավարի հետ:
Պատվիրակության անդամներն իրենց խորին անհանգստությունն են արտահայտել Փերինչեքի գործի կապակցությամբ՝ ընդգծելով ՄԻԵԴ-ի որոշման անընդունելիությունը: Որոշման կայացումից հետո երեք ամիսների ընթացքում Շվեյցարիան կարող է բողոքարկել որոշումը: Շվեյցարական դեսպանատան ներկայացուցիչները հայկական պատվիրակությանը վստահեցրել են, որ իրենց երկրի կառավարությանը կփոխանցեն այդ խնդրանքը:
Հիշեցնենք, որ ՄԻԵԴ-ը բավարարել է հակահայ թուրք գործիչ Դողու Փերինչեքի հայցն ընդդեմ Շվեյցարիայի՝ իր որոշումը հիմնավորելով խոսքի ազատության սկզբունքով: Թուրքիայի Աշխատավորական կուսակցության նախագահ Դողու Փերինչեքը 2008թ.-ին Շվեյցարիայում դատապարտվել էր Հայոց ցեղասպանության փաստը հրապարակայնորեն ժխտելու համար:
Լուրեր Հայաստանից — NEWS.am
