Թուրքիայում Ֆրանսիայի նախագահ Ֆրանսուա Օլանդի այցից սպասվող 3 անկնալիքներից 2-ը չարդարացան։ Այս մասին, այսօր՝ հունվարի 30-ին, լրագրողների հետ հանդիպմանը նշեց թուրքագետ Անդրանիկ Իսպիրյանը։
Թուրքագետի խոսքով՝ Թուրքիայում սպասում էին Ֆրանսիայի նախագահի այցին եւ ունեին 3 ակնկալիք՝ թուրք-ֆրանսիական լարված հարաբերությունների թուլացում, Հայոց ցեղասպանության հարցում ինչ-որ զիջումներ եւ Թուրքիայի ԵՄ անդամակցության հարցում Ֆրանսիայի դիրքորոշման մեղմացում։ «Առնվազն 2 կետով Թուրքիայի սպասելիքները չարդարացան։ Օլանդը ցույց տվեց, որ թե Հայոց ցեղասպանության հետ կապված հարցում, թե Թուրքիայի ԵՄ անդամակցության հարցում զիջումների չի գնում»,-նշեց Իսպիրյանը։
Այն հարցին, թե ինչով է պայմանավորված Օլանդի նման մոտեցումն այդ 2 հարցերում, թուրքագետը նշեց, թե Թուրքիայի նկատմամբ նման քաղաքականություն որդեգրել էին Օլանդի նախորդները եւ նա շարունակում է այդ գիծը։ Թուրքագետն ընդգծեց, Օլանդը Թուրքիայում ասաց այն, ինչը սպասում էին Ֆրանսիայում, այդ թվում Ֆրանսիայի հայկական լոբբին, որը լուրջ ազդեցություն ունի։ «Օլանդի հայտարարությունը կարեւոր էր, քանի որ այն կզսպի Փերինչեքի գործով ՄԻԵԴ-ի տխրահռչակ որոշումից հետո Թուրքիայի ժխտողական հեռատորաբանությունը»-ասաց թուրքագետը։
Իսպիրյանը ուշադրություն հրավիրեց այն հանգամանքին, որ Օլանդը Թուրքիայում 2 անգամ խոսեց Ցեղասպանության ժխտումը քրեականացնող օրինագծի ընդունման անհրաժեշտության մասին, որը կարելի է համարել ֆրանսիական ապտակ Թուրքիային։ «Օլանդի եզակի նախագահ է, ով Թուրքիայի նախագահի ներկայությամբ հայտարարեց Ցեղասպանության ժխտումը քրեականացնող օրենքի ընդունման անհրաժեշտության մասին»,-ասաց թուրքագետը՝ հավելելով, որ Օլանդն իր հայտարարության մեջ շեշտել է, որ նոր օրինագիծը կկազմվի հաշվի առնելով Ֆրանսիայիս ՍԴ-ի եւ վերջերս ՄԻԵԴ-ի՝ Դողու Փերինչեքի գործով կայացրած վճիռները՝ դրանց հետ հակադրություն չստեղծելու համար։
Թուրքագետն ամփոփեց, որ Ֆրանսիայում Ցեղասպանության ժխտումը քրեականացնող օրինագծի ընդունումը կախված կլինի հիշյալ ժամանակահատվածում թուրք-ֆրանսիական հարաբերություններից եւ աշխարհաքաղաքական իրավիճակից։