Ռուսաստանում Հայաստանի դեսպանությունը մշտական կապի մեջ է Արզամաս քաղաքի իշխանությունների եւ տեղի հայ համայնքի ղեկավարության հետ: Այս մասին NEWS.am-ին հայտնել է Հայաստանի ԱԳՆ մամուլի քարտուղար Տիգրան Բալայանը՝ անդրադառնալով Արզամաս քաղաքում հայի կողմից ռուս երիտասարդի սպանությունից հետո քաղաքում ստեղծված լարված իրավիճակին:
«Իրավիճակը քաղաքում վերահսկսվում է իրավապահների կողմից»,-ասել է նա:
Ավելի վաղ NEWS.am-ը հայտնել էր, որ ներկայումս Ռուսաստանի Արզամաս քաղաքում ապրող հայերը պարզապես դուրս չեն գալիս իրենց տներից, քանի որ վտանգ կա, որ սքինհեդներն ու նեոնացիստները հաշվեհարդար կտեսնեն նրանց նկատմամբ: Այս մասին NEWS.am-ի թղթակցի հետ զրույցում նշել էր Նիժնի Նովգորոդի հայերի միության նախագահ Տիգրան Շահնազարյանը՝ մեկնաբանելով Ալեքսանդր Սլակաեւի սպանության հետեւանքները, որը Արզամասի կենտրոնում տարերային հանրահավաքի պատճառ էր դարձել:
«Վարկածներից մեկի համաձայն, որը պատմել են սրճարանում աշխատող հայերը, Վաչիկ Բուլախչյանը խորոված պատրաստելիս է եղել, երբ մոտեցել են երկու ռուս երիտասարդները եւ ծխախոտ խնդրել: Նա մերժել է, որը ռուս տղաներին դուր չի եկել եւ նրանց միջեւ վիճաբանություն է ծագել: Արդյունքում նրանք սկսել են ծեծել Վաչիկին, ով հասցրել է փախչել ու թաքնվել խոհանոցում: Ռուս տղաները մտել են խոհանոց եւ շարունակել են ծեծել Վաչիկին, վերջինս սկսել է օգնություն կանչել:
Օգնության կանչերին արձագանքել են սրճարանի աշխատող 4 հայերը եւ կրկին ծեծկռտուք է սկսվել, այս անգամ 4 հայերն են ծեծել ռուս երիտասարդներին, իսկ Վաչիկը վերցրել է խոհանոցային դանակը եւ հարձակվել ռուսների վրա: Արդյունքում նրանցից մեկը ստացված վնասվածքից մահացել է»,-ասել էր Շահնազարյանը՝ նշելով, որ 27-ամյա Վաչիկ Բուլախչյանը ՀՀ քաղաքացի է, սակայն հայտնի է, որ նա փաստաթղթեր էր պատրաստում, որ ՌԴ քաղաքացիություն ստանա:
Տիգրան Շահնազարյանը նաեւ ընդգծել էր, որ ծեծկռտուքին մասնակցած ռուսի վարկածով՝ նրանք խորոված են պատվիրել, որի որակից դժգոհ են եղել եւ Վաչիկին հայտարարել են այդ մասին: Վիճաբանությունը հենց այդ պատճառով է տեղի ունեցել, որը վերաճել է ծեծկռտուքի. «Նրանց խոսքով, իրենք կատակել են՝ Վաչիկին հայտարարելով, որ խորովածը վատն է եւ որ նա իրենց վատ է կերակրում: Ի պատասխան՝ Վաչիկը սկսել է հայհոյել»:
Շահնազարյանի խոսքով՝ հակամիգրանտային ավերածությունների ընթացքում հիմնականում արգելել են այն օբյեկտները, որոնք պատկանել են հայերին կամ վարձակալվել նրանց կողմից: Օբյեկտների որոշ սեփականատերեր սկսել են հայերի հետ պյմանագրերը խզել: Նա նաեւ հավելել է, որ իրավապահները միջոցներ են ձեռնարկում՝ մթնոլորը հարթելու: «Սկզբում հակամիգրանտային ավերածությունները կատարում էին հենց Արզամասի հասարակ քաղաքացիները, սակայն շատ շուտով նրանց են միացել նաեւ սքնհեդներ ու նեոնացիստներ ոչ միայն Արզամասից, այլեւ Նիժեգորոդսկայա մարզի մյուս քաղաքներից: Ցավում ենք տեղի ունեցածի համար ու ցավակցում ենք զոհվածի հարազատներին ու մտերիմների եւ խնդրում ենք քաղաքի մթնոլորտն էլ ավելի չլարել»,-եզրափակել է Շահնազարյանը:
Ավելի վաղ NEWS.am-ը հաղորդել էր, որ Արզամաս քաղաքում հակամիգրանտային ավերածություններ են տեղի ունեցել: Ոստիկանությունը ձերբակալել է տասնյակ մարդկանց: Տեղաբնակները հասցրել են կոտրել մի քանի կրպակների ու խանութների ցուցափեղկեր: Հարձակում գործողների հիմնական նպատակակետ են դարձել երկու հայկական սրճարաններ: Ալեքսանդր Սլակաեւի սպանությունը զանգվածային հանրահավաքի պատճառ է դարձել, որը տեղի է ունեցել Արզամասի կենտրոնում: Տեղաբնակները իշխանություններից պահանջել են փակել բոլոր «ոչ ռուսական» հաստատությունները: