Թուրքիայում վերջին ամիսներին ստեղծված «Ժողովուրդների դեմոկրատական» (HDP) կուսակցության համանախագահներ Սեբահաթ Թունջելն ու Էրթուղրուլ Քյուրքչուն KCK-ի (Քուրդիստանի հասարակությունների խորհուրդ) կին համանախագահ Բեսե Հոզաթի՝ հայերի, հույների եւ հրեաների նկատմամբ թշնամանք պարունակող արտահայտության հետ կապված հայտարարություն են տարածել։
Թուրքական Bianet.org կայքի փոխանցմամբ՝ HDP-ի համանախագահներ Սեբահաթ Թունջելի եւ Էրթուղրուլ Քյուրքչուի տարածած համատեղ հայտարարության մեջ նշվել է, թե որեւէ կերպ հնարավոր չէ հայերին, հույներին եւ հրեաներին ասոցացնել Թուրքիայում առկա զուգահեռ պետությունների հետ։ «Տեսնում ենք, որ KCK-ի համանախագահ Բեսե Հոզաթի հայտարարությունը, թե հայեր, հույները եւ հրեաները Գյուլենի շարժման պես զուգահեռ պետություն են Թուրքիայում եւ խանգարում են Թուրքիայի ժողովրդավարացմանը, խիստ անհանգստացրել է թե HDP-ի անդամներին, թե հասարակությանը։
Հայերի եւ ասորիների ցեղասպանության, հույների տեղահանությունների հետեւանքով տուժվածների իրավունքները հետ ստանալու համար պայքարող HDP-ում կան հայ, հույն, հրեա, չերքեզ, արաբ, լազ եւ իհարկե թուրք եւ քուրդ անդամներ։
Մենք մտածում ենք, որ մեկ դար տեւող ժխտողականության դեմ պայքարող քուրդ ժողովրդի հեղափոխական խոսնակները պետք է մեր աշխարհագրական տարածքում ապրող ժողովուրդների հավասարության եւ եղբայրության ամրապնդման ուղղությամբ հայտարարություններ նախընտրեն»,-ասվել է հայտարարության մեջ։
Հիշեցնենք, որ Բեսե Հոզաթը ասել է, թե Թուրքիայում պաշտոնական պետությունից բացի կան նաեւ զուգահեռ պետություններ՝ օրինակ բերելով, որ Գյուլենի շարժումը զուգահեռ պետություն է։ «Հրեական լոբին, ազգայնական հայերը եւ հույները նման մեկական զուգահեռ պետություններ են։ Նման զուգահեռ պետությունները միմյանց հետ կապի մեջ են եւ շահեր ունեն միմյանցից։ Զուգահեռ պետությունները չունեն պաշտոնական եւ սահմանադրական իրավունքներ, ինչպես երեւում է չունեն նաեւ զորք, բայց ունեն կազմակերպված եւ ուժեղ կառույց»,-ասել է քուրդ կին զինյալը՝ պնդելով, թե այդ զուգահեռ պետությունները Թուրքիայում ժողովրդավարություն հաստատմանը խանգարում են։
Լուրեր Հայաստանից - NEWS.am