"Ցեղասպանությունը պատմական երեւույթ չէ, որի վերաբերյալ կարող են լինել տարբեր կարծիքներ: Ցեղասպանությունը հանցագործություն է, որին պետք է հաջորդի պատիժը, իսկ դրա չիրագործման դեպքում` դատապարտումը, որի նպատակներից մեկը ապագայում նման հանցագործությունից խուսափելն է: Ինչպես գրել է Նոբելյան մրցանակի դափնեկիր Վիզելը, ցեղասպանությունը ժխտելը հավասարազոր է զոհերին երկրորդ անգամ սպանելուն":
Սոչիի հայերի միության նախագահ Վալերի Թորոսյանը կարդում է Ռուսաստանի Պետդումա ուղղված կոչի տեքստից մի հատված: Այն խորհրդարան է ուղարկվել օրերս: Նման մի նամակ էլ փոխանցվել է Սոչիի քաղաքային խորհուրդ: Դրանցում Սոչիի հայերը պատգամավորներին կոչ են անում` հետեւել ֆրանսիացի գործընկերների օրինակին եւ Թուրքիայում հայերի նկատմամբ իրականացված Ցեղասպանության ժխտումը քրեականացնող օրենք ընդունել: Այս նպատակով կազմակերպվել է նաեւ ստորագրահավաք:
"Այստեղ ստորագրողների հասցեներն են եւ անձնագրի տվյալները: Այսպես ստորագրահավաք կազմակերպելը հեշտ չէ, իհարկե, բայց Կրասնոդար քաղաքում մի քանի օրերի ընթացքում հավաքվել է արդեն 5000 ստորագրություն, որոնք, կարծում եմ, կունենան իրենց նշանակությունը",- ասաց "Երկրամաս" թերթի խմբագիր Տիգրան Թավադյանը։
Առաջարկվում է ստորագրահավաք կազմակերպել նաեւ Ռուսաստանի Դաշնության մյուս շրջաններում: Սոչիի հայերի միությունն աջակցության կոչ է արել նաեւ հայկական կազմակերպություններին եւ Ռուսաստանում գործող հայկական լրատվամիջոցներին: Միության անդամները կարծում են, որ եկել է համառուսական մակարդակով այնպիսի կառույցի ստեղծման ժամանակը, որը կզբաղվի Թուրքիայում Հայոց ցեղասպանության 100-ամյա տարելիցի հետ կապված միջոցառումների համակարգմամբ:
"Համոզված ենք, որ Օսմանյան Թուրքիայում հայերի Ցեղասպանության եւ Երկրորդ աշխարհամարտում նացիստների իրականացրած ոճրագործությունների քրեականացումը կնպաստի ռուսական հանրության մեջ արդարության եւ մարդասիրության սկզբունքների ամրապնդմանը",- ասաց Սոչիի հայերի միության նախագահ Վալերի Թորոսյանը:
Պատգամավորներին ուղղարկված կոչում հիշեցվում է նաեւ, որ Ռուսաստանի նախաձեռնությամբ եվրոպական գերտերությունները դեռեւս 1915-ին Թուրքիայի գործողությունները որակեցին իբրեւ "մարդկության դեմ գործած ոճիր", իսկ մեր օրերում արդեն Պետդուման երկու անգամ (1995 եւ 2005թթ.) 1915-1922թթ. իրադարձությունները Ցեղասպանություն որակող ամրագրումներ ընդունեց: Սոչիի հայերի միությունը հույս ունի, որ Ռուսաստանը կլինի նաեւ առաջին երկրներից մեկը, որը կընդունի Ցեղասպանության ժխտումը քրեականացնող օրենքը:
http://www.yerkirmedia.am