Ուզբեկիստանի Հայկական մշակութային կենտրոնի վարչությունը Հանրապետական միջազգային մշակութային կենտրոնի հետ միասին կազմակերպել են Տաշկենտ քաղաքի թիվ 21 «Մեհրիբոնլիք» մանկատանը բարեգործական ակցիա՝ հանպատրաստից սարքած համերգով, որում ելույթ են ունեցել «Ուրարտու» պարային անսամբլը եւ մանկատան սաները:
Ինչպես տեղեկացնում է Ռուսաստանի հայերի «Երկրամաս» թերթի Լրատվական Կենտրոնը՝ հղում կատարելով Ուզբեկիստանի «Դեպի Ապագա» ամսագրի գլխավոր խմբագիր Գեորգի Սահակովի նյութին, հանդիսավոր ողջույնի խոսքով ելույթ են ունեցել Հանրապետական միջազգային մշակութային կենտրոնի տնօրեն Նասրետդին Մուհամմադիեւը, Հայկական ազգային մշակութային կենտրոնի վարչության նախագահ Մարտին Սեթյանը եւ Տաշկենտի Հայկական Մշակութային կենտրոնի նախագահ Սերգեյ Անդրիասովը: Երեխաների ստացած սննդամթերքն ու հրուշակեղենը, հագուստը՝ ներառյալ տաք բաճկոնները, մարզահամազգեստը եւ ոտնամանը տրամադրվել են Տաշկենտ քաղաքի հայ համայնքի ակտիվիստների կողմից:
Տարվա ավարտին անցկացված ակցիան միանգամվա չէր հայ համայնքի գործունեության մեջ: Այն Հայկական ազգային մշակութային կենտրոնի կողմից անցկացվող սոցիալական ծրագրի մի մաս է, որը նախատեսում է վետերանների, տարեց մարդկանց, սոցիալապես անպաշտպան քաղաքաքացիների հանդեպ ուշադրությունը եւ ամփոփում է ՀԱՄԿ-ի միջոցառումների շարքը՝ նրա կողմից 2011 թվականին անցկացված ուսումնական, հոգեւոր-լուսավորչական եւ միջազգային ծրագրերի շրջանակներում: