Նոյեմբերի 20-ին, Միջազգային կանանց ասոցիացիայի (Վրաստան) անդամները հյուրընկալվեցին Վիրահայոց թեմի «Հայարտուն» կենտրոնում: Միջոցառումն իրականացավ ասոցիացիայի անդամներ՝ Վրաստանում ՀՀ դեսպանի տիկին Արմինե Մանուկյանի և փոխդեսպանի տիկին Լուսինե Աֆյանի նախաձեռնությամբ և աջակցությամբ, Վրաստանում հայ կանանց «Շուշանիկ» միության հետ համագործակցությամբ: Կենտրոնի Գալուստ Գյուլբենկյան սրահ ժամանեցին ասոցիացիայի ղեկավար խորհրդի նախագահ Մարթա Ֆերեր Լյուբեքը, խորհրդի անդամ Նանա Դվալին, Գվանցա Ժուրուլին, Բենգյու Աքչարդաք Քյուչուքը, ասոցիացիայի մյուս անդամները: Հյուրընկալությանը ներկա էին Վրաստանում ՀՀ դեսպանության դիվանագետների տիկնայք, «Շուշանիկ» միության անդամներ, Գարի Դավթյան տիկնիկային մշակույթի տան տնօրեն Ժաննա Դավթյանը, «Հայարտուն» կենտրոնի աշխատակիցներ, հյուրեր: Մանրանկարիչներ Գոհար Հակոբյանի, Մերուժան Շահումյանի մանրանկարչական աշխատանքները, նկարչուհի Իռենա Օհանջանովայի ձեռքով պատրաստված զարմանահրաշ տիկնիկները և Միլենա Կվաճանտիրաձեի երևակայությամբ հավաքված զարդերը ուղղակի գերեցին ներկաներին:
Հանդիպումը բարի գալստյան մաղթանքով բացեց Լուսինե Աֆյանը և ներկայացրեց «Հայարտուն» կենտրոնի համակարգող Լևոն Չիդիլյանին: Վերջինս ողջունելով հյուրերին, պատմեց Վիրահայոց թեմի «Հայարտուն» կենտրոնի՝ հիմնադրումից առ այսօր անցած ճանապարհի մասին, իր ասածը հավաստելով էկրանին ցուցադրվող նկարներով:
Ուրախ և տպավորիչ հանդիպումն ուղեկցվեց «Անի» (պարուսուց՝ Անգելինա Նազարյան-Քոչյան) և «Ջեյրան» (պարուսուց՝ Սվետլանա Երիցյան) պարային համույթների կատարումներով և անհատ երգողներ Անի Ղուշչյանի և Հենրիխ Պետրոսյանի ելույթներով:
Հյուրերը տպավորվելով տեսածից անթաքույց զարմանք արտահայտեցին ընդամենը երեք տարվա պատմություն ունեցող «Հայարտուն» կենտրոնում վավերագրված վիթխարի աշխատանքի և ծավալված գործունեության կապակցությամբ:
Օտարազգի կանայք հիացմունքով արձագանքեցին գեղեցիկ համերգին և հայկական հյուրասիրությանը, որին իր մասնակցությունն էր բերել »Շուշանիկ» միության անդամ Ամալյա Հարությունյանը: Հանդիպումն ընթացավ Միլենա Հովհաննիսյանի հմուտ թարգմանությամբ, Հայաստանի մասին տեսաֆիլմից դրվագների ցուցադրության և սրտահույզ երաժշտության ներքո (գեղարվեստական ղեկավար՝ Պավել Օգանեզով, տեխնիկական ծառայության ղեկավար Վալերի Բադալյանը):
Հյուրերը արժևորեցին Վիրահայոց թեմի «Հայարտուն» կենտրոնում կայացած ջերմ հյուրընկալությունը և յուրահատուկ մոտեցումը:
